‘जीवनात यशस्वी होण्यासाठी शिक्षणाशिवाय पर्याय नाही,’ – अध्यक्ष डॉ. मोहम्मद अ. मुकादम
चिपळूण (योगेश पेढामकर): गोवळकोट एज्युकेशन सोसायटी संचलित खदिजा इंग्लिश मीडियम स्कूल आणि खातून अब्दुल्लाह सेकंडरी स्कूल, गोवळकोट येथे मरहूम मोहम्मद शमशुद्दीन खतीब असेंब्ली हॉलमध्ये दहावीच्या गुणवंत विद्यार्थ्यांचा सत्कार सोहळा मोठ्या उत्साहात पार पडला. ‘जीवनात यशस्वी होण्यासाठी शिक्षणाशिवाय पर्याय नाही,’ असे प्रतिपादन संस्थेचे अध्यक्ष डॉ. मोहम्मद अ. मुकादम यांनी यावेळी केले. यावर्षीही शाळेने १००% निकालाची परंपरा कायम राखल्याने सर्वत्र कौतुक होत आहे.
संस्थेचे विद्यमान चेअरमन डॉ. इसहाक खतीब यांच्या मार्गदर्शनाखाली हा कार्यक्रम संपन्न झाला. प्रशालेचे मुख्याध्यापक श्री. इरफान शेख यांनी कार्यक्रमाचे प्रास्ताविक केले. यावेळी प्रमुख पाहुणे म्हणून मौलाना आझाद अल्पसंख्याक विभाग कॉर्पोरेशन लिमिटेड, मुंबईचे संचालक डॉ. मोहम्मद असगर मुकादम, करियर विषयक प्रमुख मार्गदर्शक श्री. अखलाख अहमद शेख (मुंबई), संस्थेचे विद्यमान चेअरमन डॉ. इसहाक खतीब, श्री. पटेल अजमल फजलुद्दीन, संस्थेच्या मुख्य कार्यकारी अधिकारी सौ. उरुसा खतीब, तसेच कु. ॲड. सुमय्या मुजाहिद मेयर, श्री. निसार कादिर कटमाले (अध्यक्ष, मिनारा मशीद गोवळकोट), श्री. हारून अ. कादिर घारे (अध्यक्ष, इतिहादुल मुस्लिमिन गोवळकोट), श्री. नईम रहमान चौगुले (अध्यक्ष, नव तनझिम इस्लामिया गोवळकोट), श्री. अजीम अ. गफूर घारे, श्री. अ. रऊफ गुलाम मोहिदिन सुर्वे (केंद्रप्रमुख, गोवळकोट विभाग, पंचायत समिती चिपळूण) यांसह अनेक मान्यवर उपस्थित होते.
विद्यार्थ्यांचे देदीप्यमान यश
शाळेने यशाची परंपरा कायम राखत यावर्षीही १००% निकाल नोंदवला. यामध्ये कु. इरम अफजल घारे (९५.४०%), कु. झीनत फिरोज म्हमदुले (९३.००%), कु. मोहम्मद साद सरफराज गोठे (९१.००%), कु. ओमेमा रफीक अहमद ढेनकर (९०.४०%) आणि कु. हुदा अ. मन्नान इनामदार (९०.००%) यांनी अनुक्रमे गुण प्राप्त करून घवघवीत यश संपादन केले. एकूण ४५ विद्यार्थी प्रविष्ट झाले होते, त्यापैकी २७ विद्यार्थ्यांनी विशेष प्रावीण्य श्रेणीत, १२ विद्यार्थ्यांनी प्रथम श्रेणीत, तर ६ विद्यार्थ्यांनी द्वितीय श्रेणीत यश मिळवले.
यावेळी गुणवंत विद्यार्थ्यांनी आपली मनोगते व्यक्त करत शाळा आणि गुरुजनांविषयी कृतज्ञता व्यक्त केली. कार्यक्रमाची सूत्रसंचालन संस्थेचे विद्यमान सेक्रेटरी श्री. मुजाहिद मेयर यांनी केले.
मान्यवरांचे मार्गदर्शन व सत्कार
कार्यक्रमाच्या सुरुवातीला उपस्थित मान्यवर आणि प्रमुख अतिथींचा संस्थेचे चेअरमन डॉ. इसहाक खतीब यांच्या हस्ते यथोचित सत्कार करण्यात आला. डॉ. मोहम्मद असगर मुकादम यांचा विशेष सन्मान संस्थेचे चेअरमन डॉ. इसहाक खतीब यांनी केला. मुख्याध्यापक श्री. इरफान शेख यांनी पाहुण्यांचे स्वागत केले.
करियर विषयक मार्गदर्शक श्री. अखलाक अहमद शेख यांनी आपल्या खुमासदार शैलीत मार्गदर्शन करताना शिक्षक, पालक आणि विद्यार्थी यांच्यातील समन्वयाचे महत्त्व अधोरेखित केले. स्पर्धा परीक्षांमध्ये यश मिळवण्यासाठी आवश्यक शैक्षणिक साहित्य व विशेष मार्गदर्शन आपण उपलब्ध करून देणार असल्याचे आवाहन त्यांनी केले, तसेच भावी विद्यार्थ्यांना शुभेच्छा दिल्या. ग्रामीण भागातील विद्यार्थीही उत्तम यश संपादन करत असल्याचा अभिमान त्यांनी व्यक्त केला.
संस्थेचे चेअरमन डॉ. इसहाक खतीब यांनी विद्यार्थी घडवण्यासाठी उत्तम शिक्षकांची आवश्यकता असते आणि ते आपल्या संस्थेत आहेत, म्हणूनच असे उत्तम विद्यार्थी घडत आहेत, असे गौरव उद्गार काढले. संस्थेच्या यशासाठी सर्वांचे प्रेम आणि शुभेच्छा असेच मिळत राहो, अशी सदिच्छा त्यांनी व्यक्त केली.
कार्यक्रमाच्या शेवटी सर्व गुणवंत विद्यार्थ्यांना भेटवस्तू देऊन सन्मानित करण्यात आले आणि त्यानंतर अल्पोपहाराची व्यवस्था करण्यात आली. गोवळकोट एज्युकेशन सोसायटीचे अध्यक्ष श्री. अ. अजीज रज्जाक बेग, उपाध्यक्ष श्री. शहाबुद्दीन सुर्वे, व्हा. चेअरमन श्री. जफर कटमाले, मुख्य कार्यकारी अधिकारी सौ. उरुसा खतीब, सेक्रेटरी श्री. मुजाहिद मेयर, सल्लागार सौ. नादिया खतीब, सदस्या झरिना चौगुले, सौ. नुरी हळदे, श्री. लियाकत खतीब, श्री. अखलाक मेयर, खजिनदार श्री. जहीर नाखुदा, शाळेचे मुख्याध्यापक श्री. इरफान शेख, तसेच सर्व शिक्षक, विद्यार्थी आणि शिक्षकेतर कर्मचारी यावेळी उपस्थित होते. कार्यक्रमाचे सूत्रसंचालन संस्थेचे सेक्रेटरी श्री. मुजाहिद मेयर यांच्यासोबत विद्यालयाच्या शिक्षिका सौ. नमीरा साटविलकर आणि कु. अलमिरा वांगडे यांनी खुमासदार शैलीत केले आणि सर्वांची मने जिंकली.
