होमिओपॅथी डॉक्टरांच्या नोंदणीविरोधात उद्या रत्नागिरीत आयएमएची सेवाबंदी; सकाळी ६ पासून ओपीडी सेवा राहणार बंद

रत्नागिरी : होमिओपॅथी पदवीधर डॉक्टरांची नावे मॉडर्न मेडिसिनसाठी तयार करण्यात आलेल्या नोंदणीमध्ये समाविष्ट करण्याच्या राज्य शासनाच्या निर्णयाविरोधात इंडियन मेडिकल असोसिएशन (आयएमए) महाराष्ट्र राज्य शाखेने गुरुवार, ६ ऑगस्ट रोजी राज्यव्यापी सेवाबंदी आंदोलनाची घोषणा केली आहे. या आंदोलनाला प्रतिसाद देत आयएमए रत्नागिरी शाखेनेही गुरुवारी सकाळी ६ वाजल्यापासून वैद्यकीय सेवा बंद ठेवण्याचा निर्णय घेतला आहे.

आयएमएच्या भूमिकेनुसार, होमिओपॅथी पदवीधरांची नावे मॉडर्न मेडिसिनच्या रजिस्टरमध्ये समाविष्ट करण्याचा निर्णय वैद्यकीय शिक्षणाच्या निकषांशी विसंगत असून, राज्यातील एमबीबीएस तसेच पदव्युत्तर पदवीधर डॉक्टरांनी या निर्णयाला तीव्र विरोध दर्शविला आहे. यासंदर्भातील आक्षेप आणि भूमिका अनेकवेळा राज्य शासनाकडे मांडण्यात आली होती. मात्र, शासनाने त्याची दखल न घेता नोंदणी प्रक्रिया सुरू केल्याने राज्यभर सेवाबंदी आंदोलनाचा मार्ग स्वीकारावा लागल्याचे आयएमएने स्पष्ट केले आहे.

रत्नागिरी जिल्ह्यातील सेवाबंदीबाबत जिल्हाधिकारी कार्यालयाला पूर्वसूचना देण्यात आली असून, उपचारासाठी येणाऱ्या रुग्णांची गैरसोय टाळण्यासाठी नागरिकांनी आवश्यक ती खबरदारी घ्यावी, असे आवाहन करण्यात आले आहे. या संदर्भातील माहिती प्रसारमाध्यमांद्वारे नागरिकांपर्यंत पोहोचविण्यात येत असल्याचे आयएमए रत्नागिरीचे अध्यक्ष डॉ. निनाद नाफडे आणि सचिव डॉ. अनघा घाग यांनी प्रसिद्धीपत्रकाद्वारे सांगितले.

दरम्यान, अत्यावश्यक आणि आपत्कालीन वैद्यकीय सेवा सुरू राहणार की नाही, याबाबत संबंधित रुग्णालयांनी स्वतंत्रपणे माहिती देण्याची शक्यता असून, नागरिकांनी उपचारासाठी जाण्यापूर्वी संबंधित दवाखाना किंवा रुग्णालयाशी संपर्क साधावा, असे आवाहन करण्यात येत आहे.