चिपळूण : मोहरमच्या निमित्ताने उद्या दि. २६ जून रोजी रत्नागिरी जिल्ह्यातील मराठी माध्यमाच्या शाळांनाही सुट्टी जाहीर करण्यात आली आहे. जिल्हा परिषदेच्या शिक्षण विभागाने यापूर्वी काढलेल्या परिपत्रकात केवळ उर्दू माध्यमाच्या शाळांना सुट्टी जाहीर केली होती, मात्र आमदार शेखर निकम यांनी केलेल्या तातडीच्या हस्तक्षेपामुळे शिक्षण विभागाने आपला निर्णय बदलत सुधारित आदेश जारी केले आहेत.
रत्नागिरी जिल्हा परिषदेने जाहीर केलेल्या वार्षिक सुट्ट्यांच्या यादीत मोहरम आणि ईद-ए-मिलादच्या दिवशी केवळ उर्दू माध्यमाच्या शाळा बंद राहतील आणि मराठी शाळा सुरू राहतील, असे नमूद करण्यात आले होते. एकीकडे केंद्र व राज्य सरकारची शासकीय कार्यालये, बँका आणि निमशासकीय संस्थांना या दिवशी सुट्टी असताना, केवळ मराठी माध्यमाच्या शाळा सुरू ठेवण्याच्या निर्णयामुळे शिक्षक आणि विद्यार्थ्यांमध्ये मोठा गोंधळ व नाराजी निर्माण झाली होती. अनेक मराठी शाळांमध्ये मुस्लिम विद्यार्थी आणि शिक्षक मोठ्या संख्येने कार्यरत असल्याने त्यांनाही या सुट्ट्यांचा लाभ मिळणे अपेक्षित होते. अन्य समुदायांच्या सणांना सुट्ट्या दिल्या जात असताना, मुस्लिम सणांबाबत असा दुजाभाव का, असा प्रश्नही उपस्थित केला जात होता.
ही बाब समोर येताच मुस्लिम समाजातील प्रतिनिधींनी मुंबईत पावसाळी अधिवेशनासाठी उपस्थित असलेल्या आ. शेखर निकम यांना दूरध्वनीवरून परिस्थितीची कल्पना दिली. आ. निकम यांनी याची गंभीर दखल घेत तातडीने रत्नागिरी जिल्हा परिषदेच्या मुख्य कार्यकारी अधिकाऱ्यांशी आणि शिक्षण विभागाशी संपर्क साधला. प्रशासनाने ही चूक मान्य करून तातडीने नवीन परिपत्रक निर्गमित केले. या नवीन निर्णयानुसार, आता उद्याची मोहरमची सुट्टी मराठी शाळांनाही लागू असणार आहे. याबाबत अधिक माहिती देताना आ. शेखर निकम म्हणाले की, ही सुट्टी नाकारण्यात आल्याची माहिती मिळताच मी शिक्षण विभागाकडे विचारणा केली होती. हा प्रकार तांत्रिक चुकीमुळे झाल्याचे स्पष्ट करत विभागाने आता नवीन आदेश काढले आहेत, ज्यामुळे जिल्ह्यातील सर्व शाळांना उद्या सुट्टी असेल. आ. निकम यांच्या या तत्परतेमुळे विद्यार्थी आणि शिक्षकांमधील संभ्रम दूर झाला आहे.
