गुहागर: सेवादूत घरपोच पोहोचविणार दाखले

सेवादूत उपक्रमांतर्गत नागरिकांच्या घरीच कागदपत्रे स्कॅन

गुहागर/ प्रतिनिधी : शासनामार्फत रत्नागिरी जिल्ह्यातील गुहागर तालुक्यातील प्रथमच गुहागर शहर, असगोली व पाटपन्हाळे ग्रा.प. अंतर्गत सेवादूत हा उपक्रम राबविण्यात येत आहे. या उपक्रमांतर्गत नागरिकांशी थेट संपर्क साधून जलद व सुलभ रीतीने महसूल विभागाकडील विविध दाखले आता घरपोच उपलब्ध करून देण्यात येणार आहे. नागरिकांनी ऑनलाइन अर्ज केल्यानंतर सेवादूत घरी घेऊन आवश्यक असणारी कागदपत्रे नागरिकांच्या घरीच स्कॅन करून घेणार आहेत. नागरिकांच्या समक्ष अर्ज संबंधित प्रणालीमध्ये दाखल करण्यात येणार आहे, तसेच तयार झालेला दाखला घरपोच मिळणार आहे. गुहागरचे तहसीलदार परीक्षित पाटील यांनी सेवादूत उपक्रमाची माहिती काल रविवारी पत्रकार परिषेदेत दिली.

सद्यःस्थितीत महसूल विभागाच्या सेवा मिळण्यासाठी नागरिकांना आपले सरकार सेवा केंद्र किंवा तालुका स्तरावरील सेतू केंद्रांमध्ये जावे लागते. वयोवृद्ध नागरिक, दिव्यांग व नोकरदार वर्ग यांना आपले सरकार सेवा केंद्र किंवा सेतू केंद्रामध्ये जाऊन महसूल विभागाच्या सेवा प्राप्त करून घेणे आदी त्यांच्या शारीरिक स्थितीमुळे किंवा कामकाजाच्या वेळांमुळे जिकिरीचे व अडचणीचे ठरते.

अशा वर्गाला महसूल विभागाच्या  सेवा मिळण्यासाठीची अर्ज प्रक्रिया घरून करता आली किंवा त्यांच्या सोयीच्या वेळी करता आली, तर त्यांचे दैनंदिन जीवन सुकर होऊ शकते. यासाठी नागरिकांना ठरावीक शुल्क द्यावे लागणार आहे. या सेवेमध्ये महसूल विभागाकडील दहा प्रकारचे दाखले देण्यात येणार आहेत. यामध्ये वय राष्ट्रीयत्व व अधिवास प्रमाणपत्र, जातीचा दाखला, नॉन क्रिमीलेयर प्रमाणपत्र, उत्पन्नाचा दाखला,  तात्पुरते रहिवास प्रमाणपत्र, ज्येष्ठ नागरिक प्रमाणपत्र, शेतकरी दाखला, आर्थिक दृष्ट्या दुर्बल घटक (ईडब्ल्यूएस) प्रमाणपत्र, डोंगरी दाखला, 30 % महिला आरक्षण यांचा समावेश आहे. हा उपक्रम प्रायोगिक तत्वावर गुहागर तालुक्यातील गुहागर नगरपंचायत क्षेत्र, असगोली व पाटपन्हाळे ग्रामपंचायत क्षेत्रातील नागरिकांसाठी राबविण्यात येणार असून त्यानंतर रत्नागिरी जिल्ह्यातील सर्व तालुक्यातील शहरी व टप्प्याटप्प्याने ग्रामीण भागात लागू करण्याचा मानस आहे.

…अशी आहे कार्यप्रणाली

नागरिकांनी http://sevadootratnagiri.in/ या संकेतस्थळाचा वापर करून महसूल विभागाच्या विविध सेवांचा लाभ आपले सरकार सेवा केंद्र चालकाच्या माध्यमातून नागरिकांच्या घरूनच घेता येणार आहे. आपले सरकार सेवा केंद्राचे चालक संगणकीय प्रणालीच्याद्वारे महसुली सेवेसाठी आवश्यक असणारी कागदपत्रे नागरिकांच्या घरीच स्कॅन करून घेणार आहेत. नागरिकांच्या समक्ष अर्ज संबंधित प्रणालीमध्ये दाखल करण्यात येणार आहे. विद्यार्थ्यांनी शाळेमधून नोंदणी केल्यास त्यांच्याकडून अतिरिक्त शुल्क घेतले जाणार नाही.