रत्नागिरी: रोटरी क्लब ऑफ रत्नागिरी मिडटाउनच्या अध्यक्षपदी डॉ. सौ. स्वप्ना करे यांची निवड करण्यात आली.पदग्रहण सोहळा हॉटेल संगम रेसिडेन्सीमध्ये पार पडला. रोटरी वर्ष 1 जुलै 2025 ते 30 जून 2026 या कालावधीकरिता नव्या कार्यकारिणीची निवड करण्यात आली.
कार्यक्रमाचे प्रमुख पाहुणे व इंस्टॉलेशन ऑफिसर रोटेरिअन अशोक नाईक यांनी डॉ. सौ. करे यांना अध्यक्षपदाची सूत्रे प्रदान केली. क्लबचे सेक्रेटरी म्हणून रोटेरिअन राजेंद्र कदम तर खजिनदार म्हणून सीताराम सावंत यांची नियुक्ती करण्यात आली.
मावळते प्रेसिडेंट हिराकांत साळवी यांनी मनोगत व्यक्त करताना मागील वर्षात अनेक आव्हाने आणि अडचणींचा सामना करून आपल्या कारकिर्दीत केलेल्या कामांचा आढावा घेतला. सेक्रेटरी संदीप करे यांनी गेल्या वर्षभरात केलेल्या कार्यक्रमाचा पीपीटी प्रेझेंटेशन करून सविस्तर माहिती दिली. इंस्टॉलेशन ऑफिसर रोटेरिअन श्री. नाईक यांनी अध्यक्षीय भाषणात रोटरीची माहिती, कार्यपद्धती आणि समाजासाठी योगदान याबाबत थोडक्यात माहिती दिली.
ग्लोबल किंवा सीएसआर ग्रँट मधून लोकोपयोगी प्रोजेक्ट्स कसे करावेत याबाबत मार्गदर्शन केले.
यावेळी इनर व्हील क्लब ऑफ रत्नागिरी मिडटाउनच्या अध्यक्षा म्हणू सौ. ऋचा गांधी, सेक्रेटरी म्हणून सौ. चौधरी, तर खजिनदार म्हणून सौ. श्रद्धा सावंत यांची निवड करण्यात आली.
या कार्यक्रमदरम्यान नवीन रोटेरिअन्स आणि इनर व्हील मेंबर्सना सामावून घेण्यात आले. समाजात किंवा वैयक्तिक जीवनात ज्यांनी उत्कृष्ट काम केले आहे, अशा व्यक्तींचा मान्यवारांच्या हस्ते गौरव करण्यात आला. त्यामध्ये कोकण कोस्टल हाफ मॅरेथॉनची रत्नागिरीत सुरवात करणारे प्रसाद देवस्थळी, प्रतिकूल परिस्थितीवर मात करून वकील झालेले पत्रकार राजन चव्हाण यांचा समावेश होता.
