प्रशासनाचा इशारा दुर्लक्षित… एका उडीने आयुष्यच संपलं; २४ वर्षीय तरुणाचा नदीत बुडून मृत्यू

कर्जत : पावसाळी पर्यटनाचा आनंद लुटण्यासाठी मित्रांसोबत आलेल्या एका २४ वर्षीय तरुणाचा आनंदाचा क्षण काही क्षणांतच शोकांतिकेत बदलला. रायगड जिल्हाधिकाऱ्यांनी धबधबे, नद्या, तलाव आणि धरण परिसरात प्रवेशबंदीचे आदेश लागू केलेले असतानाही नदीत उडी मारण्याचा मोह जीवावर बेतला. कर्जत तालुक्यातील सोनलपाडा येथे रविवारी घडलेल्या या दुर्दैवी घटनेत मुंबईतील एका तरुणाचा नदीत बुडून मृत्यू झाला. या घटनेने परिसरात हळहळ व्यक्त होत असून, प्रशासनाच्या इशाऱ्यांकडे दुर्लक्ष किती महागात पडू शकते, याची पुन्हा एकदा प्रचिती आली आहे.

मिळालेल्या माहितीनुसार, मुंबईतील काही तरुणांचा गट रविवारी कर्जत तालुक्यातील सोनलपाडा परिसरात पर्यटनासाठी आला होता. नदीवरील बंधाऱ्यावरून एका २४ वर्षीय तरुणाने पाण्यात उडी मारली. मात्र, पाण्याची खोली आणि वाढलेल्या प्रवाहाचा अचूक अंदाज न आल्याने तो पाण्यात बुडाला. त्याच्या मित्रांनी आणि स्थानिक नागरिकांनी तत्काळ शोधमोहीम सुरू केली. काही वेळाने तरुणाला बाहेर काढून उपचारासाठी रुग्णालयात दाखल करण्यात आले. मात्र, डॉक्टरांनी तपासणीनंतर त्याला मृत घोषित केले.

घटनेची माहिती मिळताच स्थानिक पोलीस आणि संबंधित यंत्रणा घटनास्थळी दाखल झाली. पंचनामा करून मृतदेह शवविच्छेदनासाठी पाठविण्यात आला असून, आकस्मिक मृत्यूची नोंद करण्यात आली आहे. या प्रकरणाचा पुढील तपास सुरू आहे.

विशेष म्हणजे, पावसाळ्यात नद्या, धबधबे, तलाव आणि धरण परिसरात वाढणारा पाण्याचा प्रवाह लक्षात घेऊन रायगड जिल्हाधिकाऱ्यांनी अशा धोकादायक पर्यटनस्थळांवर प्रवेशबंदीचे आदेश जारी केले आहेत. आदेशांचे उल्लंघन करणाऱ्यांवर कारवाईचा इशाराही देण्यात आला आहे. तरीही अनेक पर्यटक हे आदेश धाब्यावर बसवत धोकादायक ठिकाणी पोहणे, पाण्यात उड्या मारणे आणि सेल्फी काढण्याचे प्रकार करत असल्याचे चित्र कायम आहे.

रविवारी घडलेली ही दुर्घटना केवळ एका तरुणाचा जीव घेणारी घटना नाही, तर प्रशासनाच्या वारंवार दिल्या जाणाऱ्या इशाऱ्यांकडे दुर्लक्ष करण्याची मोठी किंमत किती भयावह असू शकते, याची वेदनादायी आठवण आहे. पावसाळी पर्यटनाचा आनंद घेताना नियमांचे पालन करणे आणि स्वतःच्या सुरक्षिततेला सर्वोच्च प्राधान्य देणे हीच अशा दुर्घटना टाळण्याची गुरुकिल्ली असल्याचे प्रशासनाने पुन्हा एकदा आवाहन केले आहे.