लांजा शहरातील खड्डेमय रस्त्यांविरोधात शिवसेना ठाकरे गटाचा अनोखा निषेध

१५ ऑगस्टला शहरातील प्रमुख रस्त्यावर चिखल नांगरणी स्पर्धा; तहसीलदारांना निवेदन सादर

फरहान पाटणकर / लांजा: लांजा शहरातील औद्योगिक प्रशिक्षण केंद्र (आयटीआय) ते कुलकर्णी-काळे छात्रालय या मार्गावरील रस्त्याची दुरवस्था झाल्याने नागरिकांना मोठ्या गैरसोयीला सामोरे जावे लागत आहे. या खड्डेमय रस्त्याच्या समस्येकडे प्रशासनाचे लक्ष वेधण्यासाठी शिवसेना (उद्धव बाळासाहेब ठाकरे) गटाच्या वतीने अनोख्या पद्धतीने आंदोलन करण्याचा निर्णय घेण्यात आला आहे. या संदर्भात लांजा तहसीलदार यांना निवेदन देण्यात आले आहे.

शिवसेना ठाकरे गटाचे युवा तालुका अधिकारी अभिजीत राजेशिर्के यांनी यासंदर्भात लांजा तहसीलदारांना दिलेल्या निवेदनात म्हंटले आहे की, आयटीआय ते कुलकर्णी-काळे छात्रालय या दुतर्फा रस्त्याची अवस्था अत्यंत दयनीय झाली असल्याचे नमूद करण्यात आले आहे. रस्त्यात खड्डा आहे की खड्ड्यात रस्ता आहे हेच समजत नाही, अशी संतप्त प्रतिक्रिया नागरिकांमधून व्यक्त होत असल्याचेही निवेदनात म्हटले आहे.

या मार्गावर शाळा, रुग्णालय, तहसील कार्यालय, पोलीस स्टेशन, पंचायत समिती यांसह विविध महत्त्वाची कार्यालये व संस्था आहेत. त्यामुळे या रस्त्यावरून वाहनांची तसेच पायी ये-जा करणाऱ्या नागरिकांची आणि विद्यार्थ्यांची मोठी वर्दळ असते. रस्त्याच्या दुरवस्थेमुळे अपघाताचा धोका वाढला असून यापूर्वी अपघात व जीवितहानीच्या घटना घडल्याचा दावा निवेदनातून करण्यात आला आहे. रस्त्याच्या दुरुस्तीसाठी हायवे विभाग, संबंधित ठेकेदार तसेच अधिकाऱ्यांकडे पत्रव्यवहार करूनही परिस्थितीत कोणताही बदल झालेला नाही, असा आरोप शिवसेना ठाकरे गटाच्या वतीने करण्यात आला आहे.

त्यामुळे नागरिकांच्या सातत्याने होत असलेल्या गैरसोयीचा प्रतिकात्मक निषेध करण्यासाठी आता अनोख्या आंदोलनाचे हत्यार उपसण्यात आले आहे. दरम्यान, स्वातंत्र्य दिनी १५ ऑगस्ट रोजी लांजा शहरातील प्रमुख रस्त्यावर चिखल नांगरणी स्पर्धा घेण्यात येणार आहे. शिवसेना (उद्धव बाळासाहेब ठाकरे) लांजा तालुका तसेच युवासेनेच्या वतीने ही स्पर्धा आयोजित करून प्रशासनाचे लक्ष खड्डेमय रस्त्यांकडे वेधण्यात येणार आहे. रस्त्यांची तातडीने दुरुस्ती करून नागरिकांना सुरक्षित आणि सुकर वाहतूक सुविधा उपलब्ध करून द्यावी, अशी मागणी या निवेदनाद्वारे करण्यात आली आहे.