दापोली: शाळकरी मुलींचा पाठलाग करून विनयभंग केल्याप्रकरणी गुन्हा दाखल झाल्यापासून गेल्या काही दिवसांपासून फरार असलेल्या एका ३२ वर्षीय संशयित आरोपीला दापोली पोलिसांनी गोपनीय माहितीच्या आधारे शिताफीने अटक केली आहे. दिपेश दिलीप तांबे (रा. भाटघर, ता. दापोली) असे अटक करण्यात आलेल्या आरोपीचे नाव असून, या कारवाईमुळे परिसरात खळबळ उडाली आहे.
प्राप्त माहितीनुसार, गत ३१ जुलै रोजी दापोली पोलीस ठाण्यात भारतीय न्याय संहिता कलम ७५ आणि पोक्सो अधिनियम ८ नुसार सदर प्रकरणी गुन्हा नोंदवण्यात आला होता. शाळकरी मुली बसमधून प्रवास करत असताना संशयित आरोपी दिपेश तांबे याने त्यांचा पाठलाग करून विनयभंग केला होता. हा गुन्हा दाखल झाल्यापासून आरोपी पोलिसांना गुंगारा देऊन सतत फरार होता आणि पोलिसांच्या हाती लागत नव्हता.
गुन्ह्याची गांभीर्यता लक्षात घेऊन दापोली पोलिसांनी तपासाची चक्रे वेगाने हलवली. पोलीस तपासादरम्यान संशयित आरोपी हा मजुरीच्या निमित्ताने खेड आणि चिपळूण परिसरात राहत असून तिथे फार कमी वास्तव्य करत असल्याची गोपनीय माहिती पोलिसांना मिळाली. या माहितीच्या आधारे पोलिसांनी खेड-चिपळूण परिसरात कसून शोध मोहीम राबवली. अखेर स्थानिक माहिती आणि गोपनीय पथकाच्या अचूक साहाय्याने दिनांक ११ ऑगस्ट रोजी आरोपीला ताब्यात घेण्यात आले. त्याच्यावर कायदेशीर कारवाई करत पोलिसांनी त्याला अटक केली आहे. ही धडक कारवाई दापोली पोलीस ठाण्याचे पोलीस निरीक्षक महेश तोरस्कर आणि त्यांच्या पथकाद्वारे अत्यंत यशस्वीरीत्या पार पाडण्यात आली आहे.
