गणेशोत्सवासाठी कोकण रेल्वेची मार्गावर मडगाव–नागपूर आणि मडगाव–लोकमान्य टिळक टर्मिनस विशेष गाड्या धावणार

मुंबई : गणेशोत्सवाच्या पार्श्वभूमीवर कोकण रेल्वे मार्गावरील प्रवाशांसाठी मोठी आणि दिलासादायक बातमी समोर आली आहे. गणपती उत्सव तसेच सप्ताहअखेरच्या काळात वाढणारी प्रवाशांची गर्दी लक्षात घेऊन अतिरिक्त वाहतूक सुरळीत करण्यासाठी विशेष रेल्वेगाड्या चालवण्याचा निर्णय घेण्यात आला आहे. कोकण रेल्वेकडून १७ ऑगस्ट २०२६ रोजी प्रसिद्ध करण्यात आलेल्या पत्रकानुसार मडगाव–नागपूर–मडगाव आणि मडगाव–लोकमान्य टिळक टर्मिनस–मडगाव या दोन विशेष रेल्वेसेवा सुरू करण्यात येणार आहेत.

मडगाव–नागपूर विशेष रेल्वे

ट्रेन क्रमांक 01140 मडगाव जंक्शन–नागपूर विशेष ही गाडी मडगावहून रात्री ७ वाजता सुटणार आहे. अतिरिक्त गर्दीसाठी ही गाडी १८ ऑगस्ट, २५ ऑगस्ट आणि १ सप्टेंबर २०२६ रोजी धावणार आहे. तर गणपती विशेष म्हणून ८ सप्टेंबर, १५ सप्टेंबर आणि २२ सप्टेंबर २०२६ रोजीही ही सेवा उपलब्ध असेल. ही गाडी दुसऱ्या दिवशी रात्री ९.२५ वाजता नागपूर जंक्शनला पोहोचणार आहे.

याच मार्गावरील ट्रेन क्रमांक 01139 नागपूर–मडगाव विशेष नागपूरहून रात्री ११.४५ वाजता सुटेल. अतिरिक्त गर्दीसाठी १९ ऑगस्ट, २६ ऑगस्ट आणि २ सप्टेंबर रोजी, तर गणपती विशेष म्हणून ९ सप्टेंबर, १६ सप्टेंबर आणि २३ सप्टेंबर २०२६ रोजी ही गाडी धावणार आहे. मडगावला ही गाडी तिसऱ्या दिवशी पहाटे ५.३० वाजता पोहोचणार आहे.

या गाडीला करमळी, थिवीम, सावंतवाडी रोड, कुडाळ, कणकवली, वैभववाडी रोड, राजापूर रोड, रत्नागिरी, संगमेश्वर रोड, चिपळूण, खेड, माणगाव, रोहा, पनवेल, कल्याण, इगतपुरी, नाशिक रोड, भुसावळ, मलकापूर, अकोला, बडनेरा, धामणगाव, पुलगाव आणि वर्धा या स्थानकांवर थांबा देण्यात आला आहे.

मडगाव–लोकमान्य टिळक टर्मिनस विशेष

दुसरी विशेष सेवा ट्रेन क्रमांक 01004 मडगाव जंक्शन–लोकमान्य टिळक टर्मिनस अशी असून ही गाडी मडगावहून दुपारी ४ वाजता सुटणार आहे. अतिरिक्त गर्दीसाठी २३ ऑगस्ट, ३० ऑगस्ट आणि ६ सप्टेंबर २०२६ रोजी, तर गणपती विशेष म्हणून १३ सप्टेंबर, २० सप्टेंबर आणि २७ सप्टेंबर २०२६ रोजी ही गाडी धावेल. दुसऱ्या दिवशी सकाळी ६.०५ वाजता ती लोकमान्य टिळक टर्मिनसला पोहोचणार आहे.

परतीच्या प्रवासासाठी ट्रेन क्रमांक 01003 लोकमान्य टिळक टर्मिनस–मडगाव विशेष सकाळी ७.५० वाजता सुटेल. अतिरिक्त गर्दीसाठी २४ ऑगस्ट, ३१ ऑगस्ट आणि ७ सप्टेंबर रोजी, तर गणपती विशेष म्हणून १४ सप्टेंबर, २१ सप्टेंबर आणि २८ सप्टेंबर २०२६ रोजी ही सेवा धावणार आहे. ही गाडी त्याच दिवशी रात्री ११.४५ वाजता मडगावला पोहोचणार आहे.

या गाडीला करमळी, थिवीम, सावंतवाडी रोड, कुडाळ, सिंधुदुर्ग, कणकवली, नांदगाव रोड, वैभववाडी रोड, राजापूर रोड, विलवडे, आडवली, रत्नागिरी, संगमेश्वर रोड, सावर्डा, चिपळूण, खेड, माणगाव, रोहा, पेण, पनवेल आणि ठाणे या स्थानकांवर थांबा देण्यात आला आहे.

दोन्ही विशेष गाड्यांना एकूण १९ डबे असतील. त्यामध्ये ३ एसी थ्री-टियर डबे, ८ स्लीपर डबे, ६ जनरल डबे आणि २ एसएलआर/डी डबे असणार आहेत.

गणेशोत्सवाच्या काळात कोकणात मोठ्या संख्येने येणाऱ्या चाकरमान्यांसाठी या विशेष रेल्वेसेवांमुळे प्रवासाचे अतिरिक्त पर्याय उपलब्ध होणार आहेत. विशेषतः रत्नागिरी, संगमेश्वर, चिपळूण, खेड, राजापूर, कणकवली, कुडाळ आणि सावंतवाडी परिसरातील प्रवाशांना या सेवांचा मोठा फायदा होण्याची शक्यता आहे.

या विशेष गाड्यांचे सविस्तर थांबे, वेळापत्रक आणि तिकीट उपलब्धतेची माहिती भारतीय रेल्वेच्या अधिकृत चौकशी प्रणालीवर तपासता येणार आहे. प्रवाशांनी उपलब्ध सेवांचा लाभ घेण्याचे आवाहन करण्यात आले आहे.