साखरपा-देवडे रस्त्यावर खड्ड्यांचे साम्राज्य; गणेशोत्सवापूर्वी डागडुजीची मागणी

संगमेश्वर : तालुक्यातील साखरपा-देवडे मार्गाची सध्या अक्षरशः दुर्दशा झाली असून, रस्त्यावरील डांबरीकरण उखडल्याने ठिकठिकाणी मोठमोठे खड्डे पडले आहेत. खड्डे चुकवत वाहन चालवताना चालकांची कसरत होत असून, या मार्गावरून दररोज प्रवास करणाऱ्या नागरिकांच्या सुरक्षिततेचा प्रश्न निर्माण झाला आहे.

साखरपा ही परिसरातील प्रमुख बाजारपेठ असल्याने देवडे आणि आसपासच्या गावांतील नागरिकांची दैनंदिन कामांसाठी मोठ्या प्रमाणात साखरप्यावर अवलंबित्व आहे. त्यामुळे हा मार्ग परिसराच्या दळणवळणाच्या दृष्टीने अत्यंत महत्त्वाचा आहे. मात्र रस्त्याची अवस्था बिकट झाल्याने नागरिकांना नाहक त्रास सहन करावा लागत आहे.

रस्त्यावरील खड्ड्यांमुळे दुचाकी तसेच लहान वाहन घसरून अपघात होण्याच्या घटना यापूर्वीही घडल्या आहेत. विशेषतः पावसाळ्यात खड्ड्यांमध्ये पाणी साचल्याने त्यांचा अंदाज येत नसल्याने अपघाताचा धोका अधिकच वाढला आहे. रस्त्याच्या खराब अवस्थेचा फटका आपत्कालीन सेवांनाही बसत असून, रुग्णवाहिकांना या मार्गावरून ये-जा करताना विलंब होण्याची शक्यता निर्माण झाली आहे.

याशिवाय रस्त्याच्या दुतर्फा वाढलेली झाडी वाहनचालकांसाठी आणखी एक अडथळा ठरत आहे. अनेक ठिकाणी साईडपट्ट्या खराब झाल्याने आणि काटेरी झुडपे वाढल्याने दोन वाहने समोरासमोर आल्यास त्यांना सुरक्षितपणे बाजू देणेही कठीण होत आहे. त्यामुळे किरकोळ चुकाही मोठ्या अपघाताला कारणीभूत ठरू शकतात.

दरम्यान, गणेशोत्सव अवघ्या काही दिवसांवर येऊन ठेपला असून या काळात या मार्गावरील वाहतूक मोठ्या प्रमाणात वाढण्याची शक्यता आहे. गणेशोत्सवासाठी नागरिकांची मोठ्या प्रमाणात ये-जा होत असताना रस्त्याची सध्याची अवस्था अधिक धोकादायक ठरण्याची शक्यता आहे.

ही बाब लक्षात घेऊन पंचायत समिती सदस्य विद्यासागर तांदळे यांनी सार्वजनिक बांधकाम विभागाचे उपअभियंता, देवरुख (संगमेश्वर) यांच्याकडे लेखी निवेदन देत साखरपा-देवडे मार्गाची तातडीने डागडुजी करण्याची मागणी केली आहे. गणेशोत्सवापूर्वी रस्त्यावरील खड्डे डांबर व खडीच्या माध्यमातून भरून वाहतुकीसाठी मार्ग सुरक्षित करावा, अशी मागणी त्यांनी केली आहे.

गणेशोत्सवाच्या काळात नागरिकांना खड्ड्यांतून प्रवास करण्याची वेळ येऊ नये आणि अपघाताची शक्यता टाळता यावी, यासाठी सार्वजनिक बांधकाम विभागाने आता तातडीने प्रत्यक्ष पाहणी करून आवश्यक दुरुस्तीची कामे हाती घेणे गरजेचे आहे.