संगमेश्वर पोलीस ठाण्याच्या पोलीस निरीक्षकपदी मितीश केणी यांची नियुक्ती; राजेंद्र पालवे यांची रत्नागिरीत बदली

संगमेश्वर/एजाज पटेल : संगमेश्वर पोलीस ठाण्याचा पदभार काही महिन्यांपूर्वीच स्वीकारलेले पोलीस निरीक्षक राजेंद्र पालवे यांची अचानक रत्नागिरी येथे बदली झाली आहे. त्यांच्या या बदलीनंतर रिक्त झालेल्या जागी आता मितीश मदन केणी यांनी संगमेश्वर पोलीस ठाण्याच्या पोलीस निरीक्षकपदाची सूत्रे अधिकृतपणे हाती घेतली आहेत. मितीश केणी यांनी नुकताच आपल्या पदाचा पदभार स्वीकारला असून, त्यांनी पोलीस ठाण्याच्या कामकाजाची पाहणी करत प्रत्यक्ष सेवेला सुरुवात केली आहे.

नवनिर्वाचित पोलीस निरीक्षक मितीश केणी हे मूळचे सिंधुदुर्ग जिल्ह्यातील मालवण तालुक्यातील पोईप या गावचे रहिवासी आहेत. त्यामुळे कोकणातील परिस्थिती आणि स्थानिक सामाजिक रचनेची त्यांना चांगली जाण आहे. संगमेश्वर येथे रुजू होण्यापूर्वी ते रत्नागिरी जिल्ह्यातीलच मंडणगड तालुक्यातील बाणकोट पोलीस ठाण्यात पोलीस निरीक्षक या पदावर सेवा बजावत होते. बाणकोट येथील कार्यकाळात त्यांनी आपल्या उत्कृष्ट कौशल्याने कायदा आणि सुव्यवस्था अबाधित राखण्यात मोठा हातभार लावला होता.

मितीश केणी यांचा पोलीस दलातील आतापर्यंतचा संपूर्ण प्रवास अत्यंत उल्लेखनीय, शिस्तबद्ध आणि विविध आव्हानात्मक अनुभवांनी समृद्ध असा राहिला आहे. वर्ष २०१० ते २०१४ या कालावधीत त्यांनी मुंबईतील अत्यंत गजबजलेल्या आणि कायदा-सुव्यवस्थेच्या दृष्टीने संवेदनशील मानल्या जाणाऱ्या धारावी तसेच सायन भागातील पोलीस ठाण्यांमध्ये पोलीस उपनिरीक्षक म्हणून आपल्या सेवेचा यशस्वी प्रारंभ केला. या काळात त्यांनी अनेक गुन्ह्यांचा छडा लावत आपली कार्यकुशलता सिद्ध केली.

त्यानंतर त्यांची नियुक्ती त्यांच्या स्वतःच्या गृहजिल्ह्यात, म्हणजेच सिंधुदुर्ग येथे लाचलुचपत प्रतिबंधक विभागात झाली. या विभागात कार्यरत असताना त्यांनी भ्रष्टाचाराविरोधात कठोर पावले उचलत अत्यंत पारदर्शक आणि प्रभावी कामगिरी बजावली. सिंधुदुर्ग येथील यशस्वी सेवेनंतर त्यांची मुंबईतील चर्चगेट येथील अप्पर पोलीस महासंचालक कार्यालयात जबाबदारीच्या पदावर वर्णी लागली. तिथे प्रशासकीय कामकाजाचा प्रदीर्घ अनुभव घेतल्यानंतर त्यांची कल्याण येथील गुन्हे अन्वेषण विभागात (सीआयडी) बदली झाली. या विभागात त्यांनी अनेक गुंतागुंतीच्या प्रकरणांचा सखोल तपास करून आपल्या अभ्यासू आणि तपासी वृत्तीचा ठसा उमटवला.

विविध विभागांमधील प्रदीर्घ अनुभवानंतर, वर्ष २०२४ मध्ये त्यांनी बाणकोट पोलीस ठाण्याचे प्रमुख म्हणून धुरा सांभाळली आणि आता त्यांच्यावर संगमेश्वर पोलीस ठाण्याची महत्त्वाची जबाबदारी सोपवण्यात आली आहे. मुंबईतील धकाधुकीच्या आणि आव्हानात्मक वातावरणापासून ते गुन्हे अन्वेषण विभाग आणि लाचलुचपत प्रतिबंधक विभागासारख्या विशेष शाखांमध्ये काम करण्याचा दांडगा अनुभव केणी यांच्या पाठीशी आहे.

केणी यांच्या या दांडग्या अनुभवाचा फायदा संगमेश्वर तालुक्यातील कायदा व सुव्यवस्था अधिक मजबूत करण्यासाठी नक्कीच होईल, असा विश्वास व्यक्त केला जात आहे. तालुक्यातील गुन्हेगारीवर वचक बसवणे, अवैध धंद्यांचे समूळ उच्चाटन करणे आणि सामान्य नागरिकांना पोलीस ठाण्यात न्याय मिळवून देणे, याला आपले प्राथमिक प्राधान्य असेल असा संकेत त्यांनी दिला आहे. त्यांच्या या नियुक्तीमुळे स्थानिक नागरिकांमधून आणि लोकप्रतिनिधींकडून त्यांचे स्वागत केले जात आहे.