रत्नागिरी: आंतरराष्ट्रीय किनारपट्टी स्वच्छता दिनाचे औचित्य साधून, रत्नागिरी जिल्ह्यातील पूर्णगड येथे एक मोठे स्वच्छता अभियान राबवण्यात आले. या अभियानात सागरी सीमा मंच दक्षिण रत्नागिरीच्या पुढाकाराने पूर्णगड गावातील ग्रामस्थ, विद्यार्थी आणि सरकारी कर्मचाऱ्यांनी मोठ्या उत्साहात सहभाग घेतला. या सामूहिक प्रयत्नांमुळे पूर्णगडचा समुद्रकिनारा पुन्हा एकदा स्वच्छ आणि सुंदर झाला आहे.
२० सप्टेंबर रोजी आयोजित या विशेष अभियानात पूर्णगड गावातील सर्व स्तरांतील लोकांनी सक्रिय सहभाग घेतला. यामध्ये पूर्णगड मराठी नं.१ शाळा, पूर्णगड खारवीवाडा शाळा आणि पूर्णगड उर्दू शाळेचे शिक्षक व विद्यार्थ्यांनी किनारपट्टीवरील कचरा गोळा करत परिसर स्वच्छ केला. तसेच, अंगणवाडी सेविका आणि सरकारी कर्मचाऱ्यांनीही या उपक्रमाला हातभार लावला.
समुद्रकिनारी स्वच्छता राखणे किती महत्त्वाचे आहे, याचे महत्त्व या उपक्रमाने पुन्हा एकदा अधोरेखित केले. प्लास्टिक बाटल्या, कचरा आणि इतर टाकाऊ वस्तूंमुळे समुद्रातील जीवनावर होणाऱ्या दुष्परिणामांबाबत जनजागृती करणे हा या अभियानाचा मुख्य उद्देश होता.
या उपक्रमाला यशस्वी करण्यासाठी श्री. पावसकर साहेब, गावाचे प्रतिष्ठित नागरिक श्री. वासुदेव वाघे आणि श्री. दादा वाडेकर यांनी विशेष परिश्रम घेतले. त्यांच्या मार्गदर्शनामुळे आणि नियोजनामुळे हे अभियान निर्विघ्नपणे पार पडले. या महत्त्वपूर्ण कार्यामध्ये सहभागी झालेल्या सर्वांचे आभार मानून या उपक्रमाची सांगता करण्यात आली. पूर्णगडच्या या यशस्वी स्वच्छता अभियानाने इतरांनाही प्रेरणा मिळेल अशी आशा आहे.
