दोडामार्ग : वर्षा पर्यटनासाठी प्रसिद्ध मांगेली गावात अस्वलांचा मुक्त संचार वाढला आहे. असेच एक अस्वल रात्री प्रवास करताना चंद्रकांत गवस यांच्या गाडीसमोर आले. सैरभैर झालेले अस्वल गाडीसमोर धावू लागले.
श्री. गवस यांनी त्या अस्वलाची छबी आपल्या मोबाईलमध्ये कैद केली. परिसरात अस्वलाचा वारंवार वाढता वावर प्राणीप्रेमींसाठी आनंदाची पर्वणी असून ग्रामस्थ मात्र भीतीच्या छायेखाली आहे.
मागील काही महिन्यांपासून मांगेली गावात अस्वले दृष्टीस पडत आहेत. मांगेली-फणसवाडी येथील रस्त्यावर या अस्वलाच्या मुक्त संचार चंद्रकांत गवस अन्य बर्‍याचजणांना पहावयास मिळाला. बुधवारी रात्री 9 वा.च्या सुमारास श्री. गवस काही कामानिमित्त मांगेलीतून आपल्या कारने जात होते.
दरम्यान त्यांच्या कारसमोर अचानक एक अस्वल निदर्शनास आले. त्यांनी लागलीच अस्वलाची चित्रफित मोबाईलमध्ये कैद केली. महिनाभरापूर्वी मांगेलीतील एका व्यक्तीवर अस्वलाने हल्ला करून त्याला गंभीर जखमी केले होते.. अस्वलाच्या अशा मुक्त संचाराने मांगेलीतील ग्रामस्थ भीतीच्या छायेखाली वावरत आहेत.
Leave a Comment
