तुषार पाचलकर / राजापूर
ग्रामीण भागातील नागरिकांना विविध आरोग्य सेवा एकाच ठिकाणी उपलब्ध करून देण्यासाठी ‘स्वस्थ नारी सशक्त परिवार’ अभियान अंतर्गत रायपाटण येथील ग्रामीण रुग्णालयात आज, २४ सप्टेंबर रोजी सकाळी ९ ते सायंकाळी ४ वाजेपर्यंत भव्य आरोग्य शिबिराचे आयोजन करण्यात आले होते. या शिबिराला परिसरातील साडेतीनशेहून अधिक लाभार्थ्यांनी उत्स्फूर्त प्रतिसाद देत आरोग्य सेवांचा लाभ घेतला.
या शिबिरामध्ये स्त्रीरोग, हृदयरोग, मधुमेह, त्वचा रोग, मानसिक आजार, मूत्रपिंडाचे आजार, अस्थीरोग, हर्निया, हायड्रोसिल, एचआयव्ही, गुप्त रोग, नेत्र, गर्भाशयाचे आजार, बालरोग आणि इतर सर्व आजारांची तज्ज्ञ डॉक्टरांच्या माध्यमातून तपासणी व उपचार करण्यात आले. तसेच, दंत तपासणी, मौखिक आरोग्य तपासणी व उपचार, सर्व रक्तगट, लघवी तपासणी, शुगर आणि ईसीजी (ECG) इत्यादी आवश्यक तपासण्याही शिबिरात करण्यात आल्या.
कार्यक्रमाचे अध्यक्षस्थान भूषवताना रायपाटण गावचे सरपंच निलेश चांदे यांनी आपले मनोगत व्यक्त केले. त्यांनी डॉ. राम मेस्त्री यांनी ग्रामीण रुग्णालयाचा पदभार स्वीकारल्यापासून रुग्णालयात अनेक सुविधा उपलब्ध झाल्याबद्दल समाधान व्यक्त केले. त्याचबरोबर, या ठिकाणी सोनोग्राफीची सुविधा उपलब्ध झाल्यास, खेडेगावातील गर्भवती महिलांचा राजापूर किंवा रत्नागिरी येथे जाण्याचा त्रास आणि वेळ वाचेल, अशी अपेक्षाही त्यांनी व्यक्त केली.
यावेळी रायपाटण ग्रामीण रुग्णालयाचे वैद्यकीय अधीक्षक डॉ. राम मेस्त्री यांनी उपस्थितांना आहाराबद्दल मार्गदर्शन केले. त्यांनी जोंधळा, नाचणी आणि ज्वारी यांच्या भाकरीचा आहारात जास्तीत जास्त समावेश करण्याचे आवाहन केले, कारण यामुळे स्त्रियांचे आजार, मधुमेह (डायबिटीज) आणि रक्तदाब (प्रेशर) कमी होण्यास मदत होते. याउलट, पिझ्झा, बर्गर, पॅकेट फूड, तळलेले पदार्थ आणि थंड पेय यांसारख्या गोष्टी टाळण्याचा सल्ला त्यांनी दिला. हे पदार्थ चरबी वाढवून मधुमेह, रक्तदाब आणि हृदयरोगाचे प्रमाण वाढवू शकतात, असे डॉ. मेस्त्री यांनी स्पष्ट केले.
या आरोग्य शिबिराला रायपाटण गावचे सरपंच निलेश चांदे, उपसरपंच विजय जड्यार, उमेश पराडकर, दुर्गा तावडे, महादेव गुरव, प्रल्हाद नारकर, धनश्री मोरे, मनोज गांगण, माजी सरपंच राजेश नलावडे, प्रसाद देसाई, प्रकाश पाताडे, महादेव शिंदे, विनायक निखारंगे, कुणाल गांगण, चंद्रकांत लिंगायत, प्रदीप गांधी, तसेच डॉ. पंधरीकर, किशोर नांदवडेकर, यशश्री कारेकर** यांच्यासह अनेक वैद्यकीय स्टाफ आणि विविध पक्षांचे कार्यकर्ते व पदाधिकारी उपस्थित होते. एकूण साडेतीनशेहून अधिक लाभार्थ्यांनी या शिबिराचा लाभ घेतला आणि ‘स्वस्थ नारी सशक्त परिवार’ अभियान ग्रामीण भागात यशस्वी ठरले.
