देवरूख – छातीत दुखू लागल्याने आणि श्वास घेण्यास त्रास होत असल्याने रत्नागिरी येथील शासकीय रुग्णालयात (सिव्हिल हॉस्पिटल) दाखल केलेल्या बामणोली येथील ८४ वर्षीय वृद्धाचा उपचारादरम्यान मृत्यू झाल्याची घटना घडली आहे. या प्रकरणी देवरूख पोलीस ठाण्यात अकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, धकटु देवजी माईन (वय ८४, रा. बामणोली, ता. संगमेश्वर, जि. रत्नागिरी) यांना दिनांक २९ सप्टेंबर २०२५ रोजी छातीमध्ये तीव्र वेदना होऊ लागल्या, तसेच त्यांना श्वास घेण्यासही त्रास जाणवत होता. त्यामुळे कुटुंबातील सदस्यांनी त्यांना तत्काळ उपचारासाठी दुसऱ्या दिवशी, म्हणजेच ३० सप्टेंबर २०२५ रोजी मध्यरात्री ०१.०० वाजता रत्नागिरी येथील शासकीय रुग्णालयात दाखल केले.
रुग्णालयातील आयसीयू विभागात त्यांच्यावर त्वरित उपचार सुरू करण्यात आले. मात्र, उपचारादरम्यान त्यांची प्रकृती खालावत गेली. अखेर, ३० सप्टेंबर २०२५ रोजी दुपारी १२.४५ वाजता येथील वैद्यकीय अधिकाऱ्यांनी तपासणी करून त्यांना मयत घोषित केले.
या घटनेची माहिती मिळाल्यानंतर देवरूख पोलीस ठाण्यात ०२ ऑक्टोबर २०२५ रोजी दुपारी १२.५३ वाजता अकस्मात मृत्यूची नोंद करण्यात आली आहे. या प्रकरणाची नोंद अमृ. क्रमांक ३१/२०२५ नुसार भारतीय नागरिक सुरक्षा संहिता (बी.एन.एस.एस.) १९४ प्रमाणे करण्यात आली आहे. वृद्धाच्या मृत्यूचे नेमके कारण शवविच्छेदन अहवालानंतर स्पष्ट होईल, अशी माहिती पोलिसांनी दिली.
