नागरिकांची सतर्कता, पोलिसांची तत्परता!
दापोली : दिवाळी सुट्ट्यांच्या निमित्ताने दापोलीत पर्यटकांची गर्दी वाढलेली असताना, बुधवारी हर्णै येथे एका नाट्यमय घटनेमुळे मोठी खळबळ उडाली. एका महिलेला जबरदस्तीने कारमध्ये बसवून नेण्यात येत असल्याचे दृश्य पाहिल्यानंतर स्थानिक नागरिकांना अपहरणाचा तीव्र संशय आला. नागरिकांनी क्षणाचाही विलंब न लावता दापोली पोलिसांना घटनेची माहिती दिली.
नागरिकांकडून माहिती मिळताच दापोली पोलीस यंत्रणा त्वरित सक्रिय झाली. संपूर्ण परिसरात अलर्ट जारी करत पोलिसांनी बुरोंडी नाका येथे तातडीने नाकाबंदी केली आणि वाहनांची तपासणी सुरू केली. पोलिसांच्या तत्परतेमुळे काही क्षणांतच संशयित कार पोलिसांच्या ताब्यात आली आणि त्यातील व्यक्तींना चौकशीसाठी पोलीस ठाण्यात आणण्यात आले.
सखोल चौकशीअंती सत्य समोर आले. हा प्रकार अपहरण नव्हता! संबंधित पुरुष आणि महिला हे पती-पत्नी असल्याचे स्पष्ट झाले. दोघांमध्ये किरकोळ वाद झाला होता, ज्यामुळे पत्नी रागाने गाडीत बसण्यास तयार नव्हती. त्यामुळे पतीने चिडून तिला जबरदस्तीने गाडीत बसवले. हे दृश्य पाहून नागरिकांना अपहरणाचा भास झाला आणि त्यांनी सजगपणे पोलिसांना माहिती दिली.
‘अपहरण’ नव्हे तर वैवाहिक वाद असल्याचे समोर आल्यानंतर पोलिसांनी दोघांनाही समज देऊन सोडून दिले. या घटनेमुळे काही काळ दापोली पोलिसांची धावपळ झाली असली तरी, नागरिकांची जागरूकता आणि पोलिसांची तत्परता या प्रसंगातून अधोरेखित झाली. दिवाळीच्या उत्सवी वातावरणात या अपहरण नाट्यामुळे चांगलीच खळबळ माजली.
