लांजा : नगरपंचायतीच्या निवडणुकीला रंग चढत असताना प्रभाग क्रमांक २ मधून महायुतीकडून शिवसेनेचे उमेदवार पंढरीनाथ मायशेट्ये आपली प्रचारमोहीम जोमात राबवत आहेत. प्रभागातील नागरिकांशी भावनिक नाळ जपणारा, सतत जनतेमध्ये राहणारा उमेदवार म्हणून त्यांची ओळख अधिक ठळक होत चालली आहे.
“प्रभागातील लोकांचे सुख-दुःख वाटून घेणे, त्यांच्यासाठी सदैव उपलब्ध राहणे—हीच माझी सुरुवातीपासूनची भूमिका आहे. आज जनतेकडून मिळत असलेला प्रतिसाद हा माझ्यासाठी आशीर्वादच आहे. प्रभाग हेच माझं कुटुंब या भावनेतूनच मी काम करतो,” असे मायशेट्ये यांनी सांगितले.
प्रभाग २ मध्ये विविध जाती-धर्मांचे लोक सलोख्याने राहतात, आणि हा सांस्कृतिक मेळाच विकासाची खरी ताकद असल्याचे मायशेट्ये म्हणाले. “विकास सर्वांना घेऊनच शक्य आहे. सामाजिक ऐक्य आणि माणुसकी टिकवणं हे माझ्या कामकाजाचं अधिष्ठान आहे,” असे ते म्हणाले.
हॉटेल व्यवसायामुळे वर्षानुवर्षे लोकांशी थेट संपर्कात राहिल्याने प्रभागातील प्रत्येक घटकाशी जिव्हाळ्याचे संबंध निर्माण झाल्याचा त्यांच्या आत्मविश्वासातून प्रत्यय आला. “जनतेशी असलेली नाळच माझी खरी शक्ती आहे. सर्व समाजांना सोबत घेऊन विकासकामे करणे हा माझा संकल्प आहे,” असे ते म्हणाले.
कुंभार समाजातील लांजा तालुका युवा आघाडीचे अध्यक्ष आणि जिल्हा कार्याध्यक्ष म्हणून त्यांनी शैक्षणिक-सांस्कृतिक उपक्रम, गुणगौरव सोहळे, आणि युवकांसाठी विविध उपक्रम सातत्याने राबवले आहेत. “आगामी काळातही युवकांना दिशा देणारे आणि समाजहिताचे नवे उपक्रम राबवणार आहे,” असे त्यांनी स्पष्ट केले.
मायशेट्ये यांनी प्रभागातील मूलभूत सुविधा, नागरी समस्यांचे निराकरण, सामाजिक सलोखा आणि सर्वसमावेशक विकास यांना प्राधान्य देण्याचा शब्द दिला. “विश्वास हीच माझी संपत्ती आहे. प्रभागातील प्रत्येक नागरिक हा माझ्यासाठी कुटुंबाचा सदस्यच आहे,” असे ते म्हणाले.
आगामी निवडणुकीत सकारात्मक विकासदृष्टी, लोकाभिमुख दृष्टिकोन आणि सर्वसमावेशक नेतृत्वामुळे मायशेट्ये हे मतदारांच्या अपेक्षांचे उमेदवार ठरत आहेत.
