लांजा:स्वयंपाकासाठी आणलेल्या कोळंबीचे वाटण करण्याच्या क्षुल्लक कारणावरून झालेल्या वादातून एका पोटच्या मुलाने आपल्या ७० वर्षीय वृद्ध आईच्या डोक्यात दगडी वरवंटा घालून आणि शर्टाने गळा आवळून तिला ठार मारण्याचा प्रयत्न केल्याची धक्कादायक घटना लांजा तालुक्यातील धावणेवाडी येथे घडली आहे. याप्रकरणी लांजा पोलिसांनी आरोपी मुलाला ताब्यात घेतले असून त्याच्याविरुद्ध खुनाचा प्रयत्न केल्याचा गुन्हा दाखल करण्यात आला आहे.मिळालेल्या माहितीनुसार, संतोष गणपत दिवाळे (वय ३५, रा. धावणेवाडी, लांजा) असे गुन्हा दाखल झालेल्या संशयित आरोपी मुलाचे नाव असून, सुनिता गणपत दिवाळे (वय ७०) असे जखमी आईचे नाव आहे. रविवारी सायंकाळी सात वाजण्यापूर्वी ही घटना घडली.
संतोष याने बाजारातून कोळंबी आणली होती. आई सुनिता यांनी कोळंबी साफ केल्यानंतर त्यांनी मुलगा संतोषला मसाल्याचे वाटण करण्यास सांगितले. मात्र, याच गोष्टीचा राग मनात धरून संतोषने आईशी वाद घालण्यास सुरुवात केली. हा वाद इतका विकोपाला गेला की, संतापलेल्या संतोषने घरातील दगडी वरवंटा उचलून आईच्या डोक्यात प्रहार केला. इतक्यावरच न थांबता त्याने आईचा शर्टाने गळा आवळून तिला जीवे मारण्याचा प्रयत्न केला.या गंभीर घटनेनंतर लांजा पोलीस ठाण्याचे श्रेणी पोलीस उपनिरीक्षक भालचंद्र श्रीराम रेवणे यांनी सरकारतर्फे फिर्याद दिली आहे.
त्यानुसार आरोपी संतोष दिवाळे याच्यावर भारतीय दंड संहिता कलम १०९ (नवीन न्याय संहितेनुसार संबंधित कलमे) व अन्य कलमान्वये गुन्हा रजिस्टर क्रमांक ५१/२०२६ नुसार दाखल करण्यात आला आहे. या घटनेमुळे लांजा परिसरात खळबळ माजली असून, केवळ मसाल्याच्या वाटणासारख्या किरकोळ कारणावरून मुलाने आईवर केलेल्या या जीवघेण्या हल्ल्याबाबत आश्चर्य व्यक्त केले जात आहे. पोलीस या प्रकरणाचा अधिक तपास करत आहेत.
