दापोली : दापोली-खेड मार्गावर बुधवारी पहाटेच्या सुमारास एक भीषण अपघात घडल्याची धक्कादायक घटना समोर आली आहे. खेडहून दापोलीच्या दिशेने प्रवास करणारी ‘एमएच ४६ सीएच ६०५६’ या क्रमांकाची पांढऱ्या रंगाची अर्टिगा कार अचानक रस्त्यावर उलटली. टाळसुरे पोस्ट अंतर्गत येत असलेल्या खोतवाडी ग्रामपंचायत हद्दीत पहाटे ५.१५ वाजण्याच्या सुमारास हा अपघात झाला. चालकाचे वाहनावरील नियंत्रण सुटल्यामुळे कार अचानक पलटी झाली. पहाटेच्या शांततेत अपघाताचा भीषण आवाज ऐकून परिसरातील स्थानिक नागरिकांनी तात्काळ घटनास्थळाकडे धाव घेतली आणि तातडीने मदतकार्य सुरू केले.
स्थानिक ग्रामस्थांनी दाखवलेल्या तत्परतेमुळे कारमधील सर्व प्रवाशांना सुरक्षितपणे बाहेर काढण्यात यश आले. या अपघातात कारमध्ये प्रवास करत असलेले पाचही प्रवासी किरकोळ जखमी झाले आहेत. अपघाताची माहिती मिळताच संबंधित यंत्रणा आणि पोलीस पथक घटनास्थळी दाखल झाले. पोलिसांनी स्थानिक नागरिकांच्या मदतीने अपघातग्रस्त कार रस्त्यावरून बाजूला करून विस्कळीत झालेली वाहतूक पूर्ववत केली. जखमी प्रवाशांना तात्काळ उपचारासाठी जवळच्या रुग्णालयात दाखल करण्यात आले असून, सध्या सर्वांची प्रकृती स्थिर असल्याची माहिती मिळाली आहे. प्राथमिक अंदाजानुसार चालकाचे नियंत्रण सुटल्याने हा अपघात झाल्याचे बोलले जात असले, तरी अपघाताचे नेमके कारण अद्याप स्पष्ट झालेले नाही. याप्रकरणी पोलीस अधिक तपास करत असून या भीषण अपघातात कोणतीही जीवितहानी न झाल्याने सर्वांनी सुटकेचा श्वास सोडला आहे.
