धावती ट्रेन पकडण्याचा प्रयत्न जीवावर बेतला; संगमेश्वरमध्ये तरुणाचा दुर्दैवी अंत

संगमेश्वर/ एजाज पटेल: परतीच्या प्रवासाला निघालेल्या एका तरुणाचे स्वप्न संगमेश्वर रोड रेल्वे स्थानकावर मातीमोल झाले. धावती ट्रेन पकडण्याच्या प्रयत्नात पाय घसरल्याने फलाट आणि गाडीच्या मधल्या पोकळीत पडून ३३ वर्षीय तरुणाचा दुर्दैवी मृत्यू झाला. अनिल बाळू बांबाडे (रा. शेंबवणे, ता. संगमेश्वर) असे मृत तरुणाचे नाव असून, या घटनेने शेंबवणे गावावर शोककळा पसरली आहे.

गुरुवारी दुपारी १.४० वाजण्याच्या सुमारास संगमेश्वर रोड स्थानकाच्या फलाट क्रमांक १ वर सावंतवाडी-दिवा पॅसेंजर (गाडी क्र. १०१०६) आली होती. नोकरीच्या निमित्ताने मुंबईला जाण्यासाठी निघालेला अनिल गाडीत चढण्याचा प्रयत्न करत होता. मात्र, गाडीचा वेग जास्त असल्याने आणि त्याचवेळी पाय घसरल्याने तो फलाट व धावत्या गाडीच्या मधल्या अरुंद जागेत कोसळला. हा थरार पाहून उपस्थित प्रवाशांच्या काळजाचा ठोका चुकला.

अपघात घडताच रेल्वे स्थानकावरील पोलीस शिपाई बुरकुले यांनी कोणतीही वेळ न दवडता तातडीने घटनास्थळी धाव घेतली. स्टेशन मास्तरांकडून तातडीने मेमो मिळवून, खासगी रिक्षाद्वारे गंभीर जखमी अनिलला संगमेश्वर ग्रामीण रुग्णालयात दाखल केले. डॉक्टरांनी त्याचे प्राण वाचवण्यासाठी शर्थीचे प्रयत्न केले, मात्र गंभीर दुखापतीमुळे दुपारी ३.४० वाजता त्याची प्राणज्योत मालवली.

अनिल हा एक कष्टाळू आणि होतकरू तरुण होता. त्याच्या अचानक जाण्याने बांबाडे कुटुंबाचा आधार हिरावला गेल्याने परिसरात हळहळ व्यक्त होत आहे. रत्नागिरी रेल्वे पोलीस ठाण्याचे उपनिरीक्षक नवघरे यांनी घटनास्थळी पंचनामा केला असून, याप्रकरणी अकस्मात मृत्यूची नोंद करण्यात आली आहे. शवविच्छेदनानंतर मृतदेह नातेवाईकांच्या ताब्यात देण्यात आला आहे.