सिंधुदुर्ग: मुंबई-गोवा महामार्गावर बांदा बसस्थानक नजीक असलेल्या दुसऱ्या पुलावरून भरधाव वेगात असलेली कार ओहोळातील पाण्यात कोसळून अपघातग्रस्त झाली. दरम्यान
कार मधील चारही पर्यटक सुखरूप असून त्यांना रात्रीच बांदा पोलिसांनी शर्थीचे प्रयत्न करत तुडुंब भरून वाहत असलेल्या ओहोळतून बाहेर काढले.बांदा पोलीस कर्मचाऱ्यांच्या समयसूचकतेमुळे त्यांचे कौतुक होत आहे.
हि क्रेटा कार ओहोळात कोसळली. या गाडीत चारजण होते. सुदैवाने गाडीचा सनरुफ उघडल्याने हे चारहीजण बचावले. सनरुफ उघडल्याने एकाने बाहेर येत महामार्गांवरुन जाणाऱ्या गाड्यांना मदत कार्यासाठी विनवणी केली. दरम्यान अन्य तिघेजण गाडीच्या टपावर उभे राहून मदतीसाठी आरडाओरड करत होते. गस्तीवर असलेल्या बांदा पोलिसांना याची माहिती मिळताच त्यांनी तुडुंब भरलेल्या ओहळातून त्यांना बाहेर काढले. प्रथम त्यांना लाईफ जॅकेट देत दोरीच्या सह्यायाने बाहेर काढले. यात चारही जण सुखरूप असुन त्यांना कोणतीही दुखापत झाली नाही. हे वाहन सावंतवाडीतून गोव्याच्या दिशेने जात होते. यावेळी पोलीस कर्मचारी विलास भोगले, राजाराम कापसे, रोहित कांबळे, दाजी परब या पोलीस कर्मचाऱ्यांनी या तिघांचे प्राण वाचवले. या सर्व कर्मचाऱ्यांच्या समयसूचकतेबाबत त्यांचे कौतुक होत आहे.
