गुहागर: गुहागर तालुक्यातील पाटपन्हाळे ग्रामपंचायत व तंटामुक्त समिती यांच्या संयुक्त कारवाईत शृंगारतळी आठवडा बाजारात प्लास्टिक पिशवीतून वस्तू देणाऱ्या विक्रेत्यांकडून सुमारे आठ हजाराचा दंड वसूल करण्यात आला आहे. पर्यावरण संवर्धन आणि प्लास्टिकमुक्त परिसराच्या उद्देशाने पाटपन्हाळे ग्रामपंचायतीने शृंगारतळी येथील आठवडा बाजारपेठेत प्लास्टिक पिशव्यांच्या विक्रीविरोधात विशेष तपासणी मोहीम राबविली असून, या कारवाईदरम्यान बंदी असलेल्या प्लास्टिक पिशव्यांची विक्री करणाऱ्या विक्रेत्यांवर दंडात्मक कारवाई करण्यात आली आहे. विविध व्यावसायिकांची तपासणी करून प्लास्टिक पिशव्यांचा साठा जप्त करण्यात आला असून, पर्यावरणाला घातक ठरणाऱ्या प्लास्टिकचा वापर व विक्री रोखण्यासाठी ही कारवाई करण्यात आली आहे.
संबंधित विक्रेत्यांकडून एकूण आठ हजार रुपयांचा दंड वसूल करण्यात आला असून, यावेळी ग्रामपंचायतीच्या अधिकाऱ्यांनी व कर्मचाऱ्यांनी व्यापाऱ्यांना शासनाच्या प्लास्टिकबंदी नियमांचे पालन करण्याचे आवाहन केले आहे. तसेच कापडी, कागदी किंवा इतर पर्यावरणपूरक पिशव्यांचा वापर करण्याचा सल्लाही देण्यात आला असून, भविष्यात अशा प्रकारे बंदी असलेल्या प्लास्टिक पिशव्यांची विक्री किंवा वापर आढळून आल्यास संबंधितांवर अधिक कठोर कारवाई करण्यात येईल, असा इशारा ग्रामपंचायतीने दिला आहे. परिसर प्लास्टिकमुक्त करण्यासाठी ग्रामपंचायत सातत्याने जनजागृतीबरोबरच नियमित तपासणी मोहिмиही राबविणार असल्याचे सांगण्यात आले असून, या कारवाईमुळे बाजारपेठेतील व्यापाऱ्यांमध्ये नियमांचे पालन करण्याबाबत जागरूकता निर्माण झाली आहे आणि पर्यावरण संरक्षणासाठी ग्रामपंचायतीच्या या उपक्रमाचे नागरिकांनी स्वागत केले आहे. या संयुक्त कारवाईत उपसरपंच असीम साल्हे, ग्रामविकास अधिकारी सुलभा बडद, लिपिक कर्मचारी सुदेश हडकर, ग्रा.पं. सदस्य सुरेश तेलगडे, शब्बीर शेख, सचिन राऊत आणि तंटामुक्ती अध्यक्ष अजित बेलवलकर सहभागी झाले होते.
