राजू सागवेकर /राजापूर: राजापूर तालुक्यातील जैतापूर येथे जैतापूरचा राजा सार्वजनिक गणेशोत्सव मंडळ आणि आमदार किरण उर्फ भय्याशेठ सामंत यांच्या सन्मानार्थ आमदार चषक रत्नागिरी जिल्हा मानांकन कॅरम स्पर्धा २०२५-२६ चे भव्य आयोजन करण्यात आले आहे. ही प्रतिष्ठेची स्पर्धा २६ व २७ जुलै २०२५ रोजी जैतापूर येथील काझी मल्टीपर्पज हॉल, होली येथे संपन्न होणार आहे.
रत्नागिरी जिल्ह्यात आयोजित होणारी ही दुसरी मानांकन स्पर्धा असून, यात कॅरम खेळाडू विविध गटांमध्ये आपले कौशल्य दाखवतील. स्पर्धेत पुरुष एकेरी, पुरुष दुहेरी, महिला एकेरी, कुमार गट, कुमारी गट, किशोर गट आणि किशोरी गट अशा एकूण सात गटांचा समावेश आहे. प्रत्येक गटात किमान आठ स्पर्धकांची नोंदणी असणे अनिवार्य आहे, अन्यथा संबंधित गटातील स्पर्धा रद्द केली जाईल, असे आयोजकांनी स्पष्ट केले आहे.
या स्पर्धेसाठी जिल्हा रजिस्ट्रेशन फी ५० रुपये आहे. पुरुष व महिला एकेरीसाठी १५० रुपये, दुहेरीसाठी २०० रुपये, तर कुमार, कुमारी, किशोर आणि किशोरी या लहान गटांसाठी १०० रुपये प्रवेश शुल्क निर्धारित करण्यात आले आहे. सर्व इच्छुक स्पर्धकांनी आपली नोंदणी २३ जुलै २०२५ रोजी संध्याकाळी ५ वाजेपर्यंत आपल्या संबंधित तालुका प्रतिनिधीकडे शुल्कासह करणे आवश्यक आहे. स्पर्धेमध्ये सहभागी होण्यासाठी खेळाडूंना पांढऱ्या रंगाचा टी-शर्ट किंवा शर्ट परिधान करणे बंधनकारक आहे आणि या नियमाचे उल्लंघन झाल्यास कोणतीही तक्रार स्वीकारली जाणार नाही. नवीन नियमांनुसार, पुरुष दुहेरीचे सामने चार बोर्डावर तीन सेट पद्धतीने खेळवले जातील.
या स्पर्धेसाठी राष्ट्रीय पंच श्री. साई प्रकाश कानिटकर आणि राज्यस्तरीय पंच श्री. सागर कुलकर्णी हे प्रमुख पंच म्हणून जबाबदारी सांभाळणार आहेत, तर श्री. एकनाथ पाटील हे स्पर्धा प्रमुख असतील. जैतापूरचा राजा सार्वजनिक गणेशोत्सव मंडळाचे अध्यक्ष गिरीश करगुटकर आणि त्यांचे पदाधिकारी या स्पर्धेच्या यशस्वी आयोजनासाठी सक्रिय आहेत. रत्नागिरी जिल्हा कॅरम असोसिएशनचे पदाधिकारी आणि सल्लागार मंडळींनीही या स्पर्धेला भरभरून पाठिंबा दिला आहे.
तालुका प्रतिनिधींची यादी खालीलप्रमाणे आहे: गुहागर – श्री. प्रदीप परचुरे (९४२३०४८२५०), रत्नागिरी – श्री. विनायक जोशी (८३९०३८७४८३), देवरूख – श्री. राहुल भस्मे (९६५७६३७६७८) व श्री. मोहन हजारे (९४२२०५३९४३), चिपळूण – श्री. प्रकाश कानिटकर (९४०३५६४७८२) व श्री. दीपक वाटेकर (९९७५५४६६२५), संगमेश्वर – श्री. मनमोहन बेंडके (९१३०३०६५२५), लांजा – श्री. मनोज जाधव (७६२०११६७३६), खेड – श्री. योगेश आपटे (९९५३२२२६३१), राजापूर – श्री. मनोज सप्रे (९४०३७६८३७६), आणि दापोली – श्री. माधव शेट्ये (९२०९७०९७९२).
ही स्पर्धा खेळाडूंना जिल्हा स्तरावर आपले स्थान आणि प्रतिभा सिद्ध करण्याची एक मोठी संधी देणार आहे. सर्व कॅरमप्रेमींनी या स्पर्धेत मोठ्या संख्येने सहभागी होण्याचे आवाहन आयोजकांनी केले आहे. अधिक माहिती आणि नोंदणीसाठी सर्व स्पर्धकांनी आपल्या तालुका प्रतिनिधींशी तातडीने संपर्क साधावा.
