देवधे-पुनस-रत्नागिरी मार्गाची चाळण, वाहन चालवायचे कसे?संतप्त ग्रामस्थांचा सवाल

फरहान पाटणकर / लांजा : तालुक्याच्या पश्चिम भागातील अनेक गावांसाठी जीवनवाहिनी ठरलेल्या देवधे-पुनस-रत्नागिरी मार्गाची सध्या अक्षरशः चाळण झाली आहे. विशेषतः पुनस शाळा ते चाफडे गादी या मार्गावर पडलेल्या खड्ड्यांमुळे वाहनचालक हैराण झाले असून पावसाच्या पाण्याने खड्डे तुडुंब भरल्याने रस्त्यावर खड्डे आहेत की तलाव, असा प्रश्न निर्माण होत आहे. या परिस्थितीकडे सार्वजनिक बांधकाम विभागाचे दुर्लक्ष कायम राहिल्यास एखाद्याचा बळी गेल्यानंतरच विभागाला जाग येणार का? असा संतप्त सवाल ग्रामस्थांसह सरपंच संतोष लिंगायत यांनी उपस्थित केला आहे.

देवधे-पुनस-रत्नागिरी हा मार्ग पश्चिम भागातील अनेक गावांना जोडणारा महत्त्वाचा रस्ता आहे. एसटी बससह खासगी वाहनांची या मार्गावर दिवसभर मोठी वर्दळ असते. रत्नागिरीकडे जाण्यासाठी हा मार्ग कमी अंतराचा आणि सोयीचा असल्याने या रस्त्यावरून दररोज मोठ्या प्रमाणात वाहतूक होते. मात्र गेल्या दोन ते तीन महिन्यांपासून रस्त्याची अवस्था अत्यंत बिकट झाली आहे.

रस्त्याच्या या भागात ठिकठिकाणी मोठमोठे खड्डे पडले असून काही खड्ड्यांचा आकार इतका मोठा आहे की त्यातून वाहन काढणेही वाहनचालकांसाठी आव्हान ठरत आहे. त्यातच पावसाचे पाणी खड्ड्यांमध्ये साचत असल्याने त्यांची खोली आणि व्याप्ती लक्षात येत नाही. परिणामी वाहनचालकांना अचानक खड्ड्यांचा सामना करावा लागत आहे.

या मार्गावर खड्ड्यांमुळे वाहनचालकांना खड्डे चुकविताना कसरत करावी लागत असल्याने मोठा अपघात घडण्याची शक्यता नाकारता येत नाही. रस्त्याची दुरवस्था लक्षात घेऊन ग्रामस्थांनी सार्वजनिक बांधकाम विभागाकडे तक्रारी केल्या आहेत. सरपंच संतोष लिंगायत यांनीही संबंधित विभागाशी वारंवार पत्रव्यवहार करून रस्त्याची तातडीने दुरुस्ती करण्याची मागणी केली आहे.

मात्र अद्याप अपेक्षित कार्यवाही झालेली नसल्याने ग्रामस्थांचा संताप वाढत आहे. त्यामुळे अपघात होऊन एखाद्याचा जीव गेल्यावरच प्रशासनाला जाग येणार का? असा सवाल उपस्थित करत ग्रामस्थांनी तातडीने रस्त्याची डागडुजी करण्याची मागणी केली आहे. रस्त्याची डागडुजी १५ ऑगस्टपूर्वी करण्यात यावी, अशी ठाम मागणीही ग्रामस्थांनी केली आहे असून निर्धारित कालावधीत रस्त्याची दुरुस्ती न झाल्यास रस्त्यातच झाडे लावून अनोख्या पद्धतीने निषेध करण्याचा इशारा ग्रामस्थांनी दिला आहे.