रत्नागिरी: शहरातील प्रशांत नगर परिसरात पोलिसांनी मोठी कारवाई करत सुमारे ३१ हजार रुपये किमतीचा गांजा जप्त केला आहे. या प्रकरणी सत्यजीत सदाशिव जाधव (वय ३३, रा. नाचणकर चाळ, एमआयडीसी रत्नागिरी) या तरुणाला अटक करण्यात आली आहे. त्याच्या ताब्यातून ६९५.५ ग्रॅम गांजा आणि गांजा वाहतुकीसाठी वापरलेली जुपिटर कंपनीची मोटारसायकल असा एकूण ९६ हजार रुपयांचा मुद्देमाल जप्त करण्यात आला आहे.
गेल्या काही दिवसांपासून रत्नागिरी शहर पोलीस अमली पदार्थांच्या विरोधात धडक मोहीम राबवत आहेत. पोलीस निरीक्षक विवेक पाटील यांच्या मार्गदर्शनाखाली मिळालेल्या गोपनीय माहितीच्या आधारावर प्रशांत नगर परिसरात सापळा रचण्यात आला. रविवार, ३ ऑगस्ट रोजी सायंकाळी ७ च्या सुमारास पोलिसांनी संशयित आरोपी सत्यजीत जाधव याला ताब्यात घेतले. त्याची झडती घेतली असता त्याच्याकडे गांजासदृश्य अमली पदार्थ आढळून आला.
या गांजाचे वजन केले असता ते ६९५.५ ग्रॅम भरले, ज्याची अंदाजित किंमत ३१,००० रुपये आहे. पोलिसांनी यासोबतच त्याच्याकडे असलेली ६५,००० रुपये किमतीची जुपिटर मोटारसायकलही जप्त केली आहे. या कारवाईमुळे अमली पदार्थांच्या तस्करीला मोठा धक्का बसला आहे.
या कारवाईत पोलीस निरीक्षक विवेक पाटील, पोलीस उपनिरीक्षक सागर शिंदे, सहायक पोलीस फौजदार दीपक साळवी, पोलीस हवालदार पंकज पडेलकर, आशिष भालेकर, प्रशांत पाटील, अमोल भोसले आणि पोलीस कॉन्स्टेबल अमित पालवे यांच्या पथकाने महत्त्वाची भूमिका बजावली. पोलीस या प्रकरणी पुढील तपास करत आहेत.
