लांजाचे सुपुत्र मंदार जाधव यांना ‘पखवाज विशारद’ पदवी प्रदान

संगीत क्षेत्रातील उल्लेखनीय योगदानाची दखल; कुडाळ येथे मान्यवरांच्या हस्ते गौरव

लांजा : सिंधुदुर्ग जिल्ह्यातील कुडाळ येथे आयोजित संगीत महोत्सवाच्या निमित्ताने प्रभानवल्ली नांगरफळेवाडी (ता. लांजा, जि. रत्नागिरी) येथील श्री. मंदार विश्वनाथ जाधव यांना ‘पखवाज विशारद’ ही मानाची पदवी प्रदान करण्यात आली. कवी कुलगुरू कालिदास संस्कृत विश्वविद्यालय, रामटेक आणि भारतीय संगीत कलापीठ यांच्या संयुक्त विद्यमाने हा सन्मान प्रदान करण्यात आला.

जगन्नाथ संगीत विद्यालय, सिंधुदुर्ग-कुडाळ तसेच भारतीय संगीत कलापीठ केंद्र, कुडाळ येथे आयोजित संगीत महोत्सवात हा पदवी प्रदान सोहळा उत्साहात पार पडला. यावेळी ज्येष्ठ भजन गायक भजन सम्राट श्री. बुवा भालचंद्र केळुस्कर आणि गुरुमाऊली पखवाज अलंकार महेश सावंत गुरुजी यांच्या हस्ते श्री. मंदार जाधव यांना ‘पखवाज विशारद’ पदवी प्रदान करण्यात आली.

पखवाज या पारंपरिक भारतीय तालवाद्याच्या साधनेत सातत्याने योगदान देत संगीत क्षेत्रात आपली स्वतंत्र ओळख निर्माण करणाऱ्या मंदार जाधव यांच्या कलात्मक साधनेची दखल या सन्मानाच्या माध्यमातून घेण्यात आली आहे. ग्रामीण भागातून संगीताची साधना करत उच्च शिक्षणात्मक पदवी प्राप्त केल्याने त्यांच्या या यशाचे विशेष कौतुक होत आहे.

या सन्मानामुळे प्रभानवल्ली नांगरफळेवाडीसह लांजा तालुक्याच्या शिरपेचात आणखी एक मानाचा तुरा रोवला गेला आहे. मंदार जाधव यांच्या यशाबद्दल संगीतप्रेमी, कलाकार, गुरुजन, मित्रपरिवार आणि परिसरातील नागरिकांकडून त्यांच्यावर अभिनंदनाचा वर्षाव होत आहे.