गुहागर : तालुक्यात गेल्या दोन दिवसांपासून सुरू असलेल्या मुसळधार पावसामुळे अनेक ठिकाणी घरांचे नुकसान झाले, तर रस्त्यावर झाडे कोसळून वाहतूकही विस्कळीत झाली. सुदैवाने कोणतीही जीवितहानी झालेली नाही. रविवारी रात्रीपर्यंत झालेल्या पावसाची नोंद ११३ मिलिमीटर इतकी झाली आहे.
जांभारी येथील दर्शना विजय सुर्वे यांच्या घरावर झाड कोसल्याने छपराचे नुकसान झाले. बंदरवाडी येथे संतोष नाटेकर यांच्या घराजवळील बांध कोसळला. कोतळूक-शिगवणवाडी येथील प्रकाश दत्तराम शिगवण यांच्या मालकाचा गोठा कोसळला. पेवे गावात रज्जाक हसन पेवेकर यांच्या घराचे अंशतः नुकसान झाले.
वेळणेश्वर-खारवीवाडी येथील जिल्हा परिषदेच्या साकवाच्या पायऱ्या खचल्या. पाटपन्हाळे येथील मालती महिपत चव्हाण यांच्या घराच्या दोन भिंती कोसळल्या. आबलोलीतील बौद्धवाडी समाजमंदिराच्या इमारतीचेही पावसामुळे मोठे नुकसान झाले.
दरम्यान, वेलदूर, पोमेंडी-गोणवली या मार्गांवर झाडे पडल्याने रस्त्यावरील वाहतूक बंद झाली होती. मात्र झाडे तोडून वाहतूक पुन्हा सुरळीत करण्यात आली आहे.
