आमदार शेखर निकम यांच्या हस्ते ‘कर्तव्य संहिता वाचनालया’चे लोकार्पण
रत्नागिरी : छत्रपती शिवाजी महाराज महाराजस्व अभियानाचे औचित्य साधून देवरुख येथील मंडळ अधिकारी कार्यालयात आज महसूल प्रशासन अधिक लोकाभिमुख, पारदर्शक आणि गतिमान करण्यासाठी विविध नाविन्यपूर्ण उपक्रमांचा शुभारंभ करण्यात आला. आमदार शेखर निकम यांच्या हस्ते ‘कर्तव्य संहिता वाचनालया’चे लोकार्पण करण्यात आले.
या प्रसंगी पंचायत समिती सभापती शर्वरी वेल्ये, पंचायत समिती सदस्य प्रफुल्ल बाईत, तहसीलदार अमृता साबळे यांच्यासह अनेक स्थानिक लोकप्रतिनिधी आणि नागरिक मोठ्या संख्येने उपस्थित होते.
जिल्हाधिकारी मनुज जिंदल आणि उपविभागीय अधिकारी जीवन देसाई यांच्या प्रेरणेने तसेच तहसीलदार श्रीमती साबळे यांच्या प्रत्यक्ष मार्गदर्शनाखाली देवरुख मंडळ अधिकारी कार्यालयात हे तंत्रज्ञानाधारित आणि ज्ञानवर्धक उपक्रम प्रभावीपणे राबविण्यात येत आहेत. यातून नागरिकांना अधिक चांगल्या आणि तत्पर सेवा देण्याचा प्रशासनाचा प्रयत्न आहे.
लोकसहभागातून साकारले ‘कर्तव्य संहिता वाचनालय‘
या नाविन्यपूर्ण उपक्रमांतर्गत लोकसहभागातून कार्यालयात ‘कर्तव्य संहिता वाचनालय’ उभारण्यात आले आहे. या वाचनालयात १०० हून अधिक कायदेविषयक पुस्तके, विविध अधिनियम, संहिता आणि संदर्भग्रंथ ठेवण्यात आले आहेत. विशेष म्हणजे, ही सर्व पुस्तके नागरिकांसाठी आणि विद्यार्थ्यांसाठी मोफत वाचनासाठी उपलब्ध करून देण्यात आली असून, यामुळे महसूल आणि कायदेविषयक साक्षरता वाढण्यास मोठी मदत होणार आहे.
More Read
‘स्मार्ट’ आणि तंत्रज्ञानाधारित प्रशासनावर भर
वाचनालयासोबतच कार्यालयात अनेक आधुनिक आणि तंत्रज्ञानाधारित उपक्रम राबविले जात आहेत:
नागरिकांचा अभिप्राय: कामकाजाबाबत नागरिकांना आपला अभिप्राय तात्काळ नोंदवता यावा यासाठी ‘क्यूआर कोड’ (QR Code) प्रणाली लागू करण्यात आली आहे.
जनजागृती: नागरिकांच्या माहितीसाठी ‘अधिमूल्य रक्कम जनजागृती फलक’ लावण्यात आले आहेत.
More Read
डिजिटल साक्षरता: महसूल विभागाच्या विविध डिजिटल सेवांची माहिती देणारा ‘SMART प्रशासन उपक्रम’ सुरू करण्यात आला आहे.
कामकाजाचे नियोजन: दैनंदिन कामकाजाचे सुयोग्य आणि प्रभावी नियोजन करण्यासाठी आंतरराष्ट्रीय स्तरावरील ‘आयसेनहॉवर मॅट्रिक्स’ (Eisenhower Matrix) चा वापर करण्यात येत आहे.
पारदर्शकता: ‘ई-फेरफार कार्यप्रदर्शन फलक’ आणि ‘साप्ताहिक महसूल विचार’ यांसारखे उपक्रमही नागरिकांचे लक्ष वेधून घेत आहेत.
वरिष्ठ अधिकाऱ्यांच्या मार्गदर्शनाखाली ग्राम महसूल अधिकारी, महसूल सेवक आणि नागरिकांच्या सक्रिय सहभागातून हे उपक्रम यशस्वीपणे पुढे नेले जात आहेत. या सर्व बदलांमुळे देवरुख मंडळ अधिकारी कार्यालय हे तंत्रज्ञानाधारित, ज्ञानसमृद्ध, पारदर्शक आणि नागरिकाभिमुख प्रशासनाची प्रभावी अंमलबजावणी करणारे जिल्ह्यातील एक मॉडेल कार्यालय म्हणून नावारूपाला येत असल्याचे यातून अधोरेखित झाले आहे.
