देवरूख : दिल्लीतील जंतर-मंतर येथे आपल्या न्याय्य मागण्यांसाठी शांततापूर्ण आंदोलन करणाऱ्या विद्यार्थ्यांवर पोलिसांकडून झालेल्या कारवाईच्या निषेधार्थ देवरूख नगरपंचायतीच्या मासिक सभेत सात नगरसेवकांनी हाताला काळ्या फिती बांधून सहभाग घेत निषेध नोंदवला. विद्यार्थ्यांवरील लाठीहल्ल्याचा तीव्र निषेध व्यक्त करत नगरसेवकांनी आंदोलक विद्यार्थ्यांशी ऐक्य दर्शविले.
नगरपंचायतीच्या मासिक सभेचे संपूर्ण कामकाज संबंधित नगरसेवकांनी हाताला काळी फित बांधून पार पाडले. या प्रतीकात्मक आंदोलनामुळे सभागृहातील वातावरण काही काळ गंभीर झाले होते. विद्यार्थ्यांच्या समर्थनार्थ आणि अन्यायाविरोधात लोकप्रतिनिधींनी घेतलेल्या या भूमिकेची देवरूख शहरासह राजकीय व सामाजिक वर्तुळात जोरदार चर्चा सुरू आहे.
या निषेध आंदोलनात शिवसेना (उद्धव बाळासाहेब ठाकरे) गटाचे नगरसेवक बाळा कामेरकर, नगरसेविका निधा कापडी व रितिका कदम, मनसेचे नगरसेवक अनुराग कोचिरकर, अक्षय झेपले तसेच अपक्ष नगरसेवक सिद्धेश वेल्हाळ आणि सागर संसारे यांनी सहभाग घेतला.
दिल्लीतील विद्यार्थ्यांच्या आंदोलनाला देवरूख नगरपंचायतीच्या माध्यमातून मिळालेल्या या नैतिक पाठिंब्याचे आणि लोकप्रतिनिधींनी दाखवलेल्या संवेदनशील भूमिकेचे शहरातील नागरिकांकडून स्वागत केले जात आहे.
