रत्नागिरी: महिला आर्थिक विकास महामंडळांतर्गत (माविम) कार्यरत असलेल्या कम्युनिटी रिसोर्स पर्सन (सीआरपी) महिलांनी आज जिल्हाधिकारी कार्यालयाबाहेर धरणे आंदोलन केले. ‘उमेद’ (महाराष्ट्र राज्य ग्रामीण जीवनोन्नती अभियान) अंतर्गत काम करणाऱ्या सीआरपींप्रमाणेच मासिक मानधन आणि इतर सुविधा मिळाव्यात, अशी त्यांची प्रमुख मागणी आहे. भारतीय मजदूर संघाशी संलग्न कंत्राटी कर्मचारी संघाने बुधवारी आयोजित केलेल्या राज्यव्यापी धरणे आंदोलनाचा एक भाग म्हणून, रत्नागिरी येथे जिल्हाधिकारी कार्यालयासमोर हे आंदोलन करण्यात आले. यामध्ये जिल्ह्यातील शेकडो सीआरपी महिला सहभागी झाल्या होत्या. आंदोलक महिलांनी आपल्या विविध मागण्यांचे निवेदन जिल्हा प्रशासनाला सादर केले.
माविमच्या लोकसंचालित साधन केंद्रातील कर्मचाऱ्यांसाठी मासिक मानधन आणि प्रशासकीय खर्चासाठी राज्यस्तरावर २५ लाख रुपयांची तरतूद करावी, अशी त्यांची एक महत्त्वाची मागणी आहे. तसेच, सीआरपी म्हणून कार्यरत असलेल्या महिलांना ‘उमेद’च्या सीआरपींप्रमाणे दरमहा ६,००० रुपये मानधन मिळावे, अशीही त्यांची मागणी आहे. यासोबतच, माविम अंतर्गत स्थापन झालेल्या प्रत्येक बचत गटाला ३०,००० रुपये फिरता निधी उपलब्ध करून द्यावा आणि बचत गटांना ७ टक्के व्याजाने बँक कर्ज उपलब्ध करून द्यावे, अशा मागण्याही करण्यात आल्या आहेत.
या मागण्यांचे निवेदन राज्याचे मुख्यमंत्री देवेंद्र फडणवीस यांना पाठवण्यात आले असून, रत्नागिरीमध्ये जिल्हाधिकाऱ्यांमार्फत ते सादर करण्यात आले. महिलांच्या उन्नतीसाठी कार्यरत असलेल्या या सीआरपी महिलांच्या मागण्यांवर शासनाने लवकरात लवकर निर्णय घ्यावा, असे म्हणणे या आंदोलनात सहभागी महिलांनी मांडले आहे. शासनाने आपल्या मागण्या गांभीर्याने घ्याव्यात, अशी अपेक्षा त्यांनी व्यक्त केली आहे.
