गणेशोत्सवापूर्वी देवरुख–परचुरी–फुणगूस मार्गावर एसटी सेवा सुरू करण्याची सुभाष लांजेकर यांची मागणी

देवरुख : देवरुख–परचुरी–फुणगूस बाजारपेठ या मार्गावर एसटी सेवा सुरू करण्याच्या मागणीने पुन्हा जोर धरला असून, सामाजिक कार्यकर्ते सुभाष रमेश लांजेकर यांनी यासाठी पुढाकार घेतला आहे. या संदर्भात त्यांनी वाहतूक निरीक्षक सचिन रमेश सुर्वे यांची भेट घेऊन सविस्तर निवेदन सादर केले. गणेशोत्सवापूर्वी या मार्गावर एसटी सेवा सुरू करण्यात यावी, अशी मागणी त्यांनी केली आहे.

देवरुख येथून सुटणारी एसटी बस सध्या परचुरी शाळा क्रमांक २ पर्यंतच येत असल्याने त्यापुढील फुणगूस आणि परिसरातील ग्रामस्थांची मोठी गैरसोय होत आहे. त्यामुळे सद्यस्थितीत सुरू असलेली बससेवा फुणगूस बाजारपेठेपर्यंत वाढविण्यात यावी किंवा देवरुख–परचुरी–फुणगूस या मार्गावर स्वतंत्र नवीन एसटी सेवा सुरू करण्यात यावी, अशी मागणी निवेदनाद्वारे करण्यात आली आहे.

फुणगूस आणि परिसरातील नागरिकांना तहसील कार्यालय, पंचायत समिती, बँका तसेच विविध शासकीय कामांसाठी वारंवार देवरुख येथे जावे लागते. त्याचबरोबर अनेक विद्यार्थी महाविद्यालयीन शिक्षणासाठी दररोज देवरुख येथे प्रवास करतात. फुणगूस येथे ग्रामीण रुग्णालय आणि बाजारपेठ असल्यामुळे परचुरीसह आसपासच्या गावांतील नागरिकांची या मार्गावर मोठ्या प्रमाणात ये-जा असते. त्यामुळे एसटी सेवा सुरू झाल्यास विद्यार्थी, ज्येष्ठ नागरिक, रुग्ण तसेच सर्वसामान्य ग्रामस्थांना मोठा दिलासा मिळणार आहे.

या मागणीसाठी सुभाष रमेश लांजेकर यांनी यापूर्वीही परिवहन मंडळाकडे सातत्याने पाठपुरावा केला आहे. सुरेंद्र श्रीकृष्ण कुलकर्णी यांनी दोन वेळा परिवहन मंडळाकडे निवेदन सादर करून या मागणीला पाठिंबा दिला आहे. तसेच गजानन नारायण जोशी यांनीही परिवहन मंडळाकडे निवेदन देत फुणगूस मार्गावरील एसटी सेवेसाठी पाठपुरावा केला आहे.

दरम्यान, मागणीला व्यापक पाठिंबा मिळावा यासाठी सुभाष लांजेकर यांनी ग्रामस्थांच्या स्वाक्षऱ्या गोळा करण्यास सुरुवात केली आहे. तसेच ग्रामपंचायतीच्या ठरावाची प्रतही संबंधित विभागाकडे सादर करण्यात आली आहे. त्यामुळे परिवहन विभागाने या मागणीचा गांभीर्याने विचार करून मार्गाची पाहणी करावी आणि प्रवाशांची गरज लक्षात घेऊन योग्य निर्णय घ्यावा, अशी अपेक्षा ग्रामस्थांकडून व्यक्त होत आहे.

गावाच्या विकासाशी संबंधित विविध प्रश्नांवर सुभाष रमेश लांजेकर सातत्याने पाठपुरावा करत असून, पायाभूत सुविधा, वाहतूक व्यवस्था आणि ग्रामस्थांच्या दैनंदिन अडचणी सोडविण्यासाठी ते पुढाकार घेत असल्याचे ग्रामस्थांनी सांगितले. गणेशोत्सवाच्या पार्श्वभूमीवर या मार्गावर प्रवाशांची वाढणारी गर्दी लक्षात घेता देवरुख–परचुरी–फुणगूस बाजारपेठ मार्गावर एसटी सेवा गणेशोत्सवापूर्वी सुरू करावी, अशी जोरदार मागणी आता होत आहे.