अजितदादांच्या प्रतिमेला औक्षण करून महिला पदाधिकाऱ्यांनी साजरे केले रक्षाबंधन

निधनानंतरच्या पहिल्याच रक्षाबंधनाला आठवणींनी महिला पदाधिकारी भावूक; चिपळूण राष्ट्रवादी कार्यालयात भावनिक वातावरण

चिपळूण : महाराष्ट्राचे माजी उपमुख्यमंत्री तथा राष्ट्रवादी काँग्रेसचे नेते स्व. अजितदादा पवार यांच्या निधनानंतरचे पहिले रक्षाबंधन चिपळूण तालुका राष्ट्रवादी काँग्रेसच्या कार्यालयात भावनिक वातावरणात साजरे करण्यात आले. महिला पदाधिकाऱ्यांनी अजितदादांच्या प्रतिमेला औक्षण करून रक्षाबंधन साजरे केले. यावेळी अजितदादांच्या आठवणींना उजाळा देताना महिला पदाधिकारी भावूक झाल्या.

रक्षाबंधन हा भाऊ-बहिणीच्या नात्यातील जिव्हाळा आणि संरक्षणाची भावना व्यक्त करणारा सण आहे. याच भावनेतून राष्ट्रवादीच्या महिला पदाधिकाऱ्यांनी अजितदादांच्या प्रतिमेस राखी बांधून त्यांना अभिवादन केले. अजितदादांच्या अकाली निधनानंतरचे हे पहिलेच रक्षाबंधन असल्याने त्यांच्या आठवणींनी उपस्थितांचे डोळे पाणावले.

अजितदादा पवार यांनी पक्ष संघटन, सामाजिक आणि राजकीय क्षेत्रात केलेल्या कार्याच्या आठवणी यावेळी जागविण्यात आल्या. त्यांच्या कार्याची प्रेरणा कायम स्मरणात राहील, अशी भावना महिला पदाधिकाऱ्यांनी व्यक्त केली.

या कार्यक्रमास राष्ट्रवादी काँग्रेसच्या प्रदेश महिला सरचिटणीस दिशा दाभोळकर, शहर अध्यक्षा अदिती देशपांडे, माजी नगरसेविका शिवानी पवार, माजी नगरसेविका वर्षा जागृष्टे, डॉ. रेहमत जबले, जिल्हा महिला उपाध्यक्षा रविना गुजर, जिल्हा समन्वयक मनाली जाधव, शहर उपाध्यक्षा पूनम भोजने, शहनाज वांगडे, मीरा नारकर आदी महिला पदाधिकारी उपस्थित होत्या.

अजितदादांच्या प्रतिमेला औक्षण, राखी बांधून आणि पुष्प अर्पण करून महिला पदाधिकाऱ्यांनी त्यांच्या स्मृतींना अभिवादन केले. रक्षाबंधनाच्या या भावनिक उपक्रमामुळे चिपळूण राष्ट्रवादी काँग्रेसच्या कार्यालयात काही काळ हळवे वातावरण निर्माण झाले होते.