चिपळूण : कळकवणे येथे घरफोडी; १ लाख १७ हजारांचा ऐवज लंपास

चिपळूण : तालुक्यातील कळकवणे-ऐनाडवाडी येथे घरात कोणी नसल्याची संधी साधून अज्ञात व्यक्तीने घरात प्रवेश करून कपाटातील लॉकरमधून सोन्याचे दागिने व रोख रक्कम असा एकूण १ लाख १७ हजार रुपयांचा ऐवज लंपास केल्याची घटना घडली. या प्रकरणी संशयित म्हणून राकेश प्रभाकर सुर्वे (रा. कळकवणे, ऐनाडवाडी, ता. चिपळूण) याच्याविरुद्ध पोलिसांत गुन्हा दाखल करण्यात आला आहे.

पोलिसांनी दिलेल्या माहितीनुसार, ही चोरी ९ सप्टेंबर रोजी दुपारी ३ वाजल्यापासून १० सप्टेंबर रोजी सकाळी ९ वाजेपर्यंतच्या कालावधीत घडली. कळकवणे-ऐनाडवाडी येथे राहणारे सेवानिवृत्त दीपक रत्नाकर शिंदे (वय ६३) यांच्या घराच्या उघड्या दरवाजातून प्रवेश करून चोरट्याने पत्र्याच्या कपाटातील लॉकरमधून सोन्याचा सुमारे दोन तोळे वजनाचा हार, दीड तोळे वजनाचे कानातील फुल्ले व पट्टी, एक ग्रॅम वजनाची नथणी, अडीच ग्रॅम वजनाचे ‘ॐ’ नावाचे गळ्यातील पान तसेच १ हजार ५०० रुपयांची रोख रक्कम असा ऐवज चोरून नेला.

या चोरीत सुमारे १ लाख १५ हजार ५०० रुपयांचे सोन्याचे दागिने व रोख रक्कम असा एकूण १ लाख १७ हजार रुपयांचा मुद्देमाल चोरीस गेल्याचे फिर्यादीत नमूद करण्यात आले आहे. या प्रकरणी दीपक शिंदे यांनी १० सप्टेंबर रोजी रात्री ९.३८ वाजता पोलिसांत तक्रार दाखल केली. संशय व्यक्त केलेल्या राकेश प्रभाकर सुर्वे याच्याविरुद्ध भारतीय न्याय संहितेतील कलम ३८० अन्वये गुन्हा दाखल करण्यात आला असून, पुढील तपास पोलीस करीत आहेत.